Tani është bërë e qartë përse u krijua dikasteri që drejton Blendi Gonxhe, i shoqëruar me kalimin e agjencisë së tenderave të përqendruar nga Ministria e Brendshme tek Ministri i Ekonomisë, Kulturës dhe Inovacionit. Vetëm emri ka ndryshuar, duke e quajtur Operatori i Blerjeve të Përqendruara, por abuzimet me tenderat vazhdojnë nga një dorë e re.
Së fundmi, Operatori i Gonxhes kërkon të blejë mish për azilet dhe spitalet në mënyrë të parregullt. Më datë 26 nëntor 2024, në Agjencinë e Prokurimeve Publike është shpallur gara për tenderin me objekt ‘Loti I “Blerje mish dhe nënproduktet e tij”, për të cilin Operatori i Blerjeve të Përqendruara ka vënë në dispozicion 230 milionë lekë.
Kjo shifër justifikohet me faktin se do të blihet mish për:
1.Spitali Rajonal Fier
2. Qendra Ditore Polivalente, Bashkia Sarande
3. Drejtoria e Spitalit Rajonal Gjirokastër
4. Shtëpia e të Moshuarve Shkodër
5. Drejtoria e Shërbimit Spitalor Bulqizë
6. Drejtoria e Shërbimit Spitalor Korçë
7. Drejtoria e Përgjithshme e Policisë së Shtetit /Departamenti për Kufirin dhe Migracionin.
Duhet të theksojmë se më së shumti janë porositur salçiçe dhe proshuta, që shpesh të moshuarit nuk i konsumojnë dhe nuk janë të rekomandueshme për të sëmurët nëpër spitale.
Gjithsesi problemi qëndron edhe më thellë.
Ky tender parashikohet që të zhvillohet më datë 17 dhjetor 2024, ndërkohë që Open Data Albania e ka vlerësuar paraprakisht me “Flamur të kuq”. Monitoruesi i pavarur paralajmëron se ky është një tender që është anuluar më shumë se dy herë, gjë që ligji për prokurimet nuk e lejon.
Nuk paraqitet ndonjë dokument as në KPP përse është anuluar ky tender dy herë, por historia ka treguar që anulimet ndodhin për shkak të problematikave në kritere, apo përzgjedhje operatorësh.
Cilado që të ketë qenë arsyeja, “Flamuri i Kuq” është shenja e riskut të korrupsionit, që tregon se ky prokurim nuk është në rregull për të vazhduar procedurat, pasi rreziku është i lartë për shpërdorimin e fondit.
Theksojmë se në këtë projekt përfshihet po ashtu, edhe Loti 2 me objekt “Blerje peshq”.
Ajo që na bie në sy është se peshku do të blihet në Korçë i cilësisë së dytë. Mos harrojmë se këtu se ky produkt do të konsumohet në spital dhe në shtëpinë e të moshuarve.
Në fakt, Operatori i Blerjeve të Përqendruara ndjek traditë e shpërdorimeve në këto institucione. Në vitin 2022 është hapur një tender me objekt “blerje artikuj ushqimorë” me fond 6.7 milionë lekë. Në Lotin 2, kjo agjenci kërkonte “Blerje peshq” për Shtëpinë e të Moshuarve Tiranë, me fond 274 mijë lekë. Dhe, vetëm për Azilin, kërkohej të blihej peshk i cilësisë së tretë.
Ndërkohë, institucionet e tjera në këtë tender kanë kërkuar të blejnë peshk të cilësisë së dytë.
Emisioni “Fiks Fare” në atë kohë ka denoncuar se shtëpitë e Pushimit, atje ku qëndrojnë krerët e shtetit, blejnë peshk dhe fruta deti të cilësisë së parë. Madje, edhe pajisje për pastrim dhe filetim të peshkut. Ndërkohë, i vetmi institucion që blen peshk të cilësisë së tretë është Shtëpia e të Moshuarve në Tiranë (Azili i Pleqve).
Ndërsa tani meqenëse bëhet fjalë për të sëmurë e të moshuar, Gonxhe do të blejë për të gjithë peshk të cilësisë së dytë.
Ne sugjerojmë që dokumentet e këtij tenderi të shikohen me kujdes nga Agjencia e Prokurimeve, pasi bëhet fjalë për ushqimin e njerëzve të sëmurë dhe të moshuar.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet .nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post