Ministri i Ekonomisë, Kulturës dhe Inovacionit, Blendi Gonxhe, po krijon monopolin e lavanterisë për spitalet, duke ia dhënë shumicën e tyre dy kompanive. Kemi raportuar qysh në fillim të këtij viti vazhdimisht shkeljet në tenderët për pastrime, lavanderitë e spitaleve, ku janë favorizuar nga Operatori i Blerjeve të Përqendruara dy emra: Kristinka Leka dhe Plarent Gjinari.
Vetë dy ditë më parë denoncuam abuzimet në tenderin 2.3 milionë euro për lavanterinë e spitaleve në Fier, ndërsa tani Gonxhe po i jep paketë 123 milionë lekë në një qytet tjetër.
Bëhet fjalë për prokurimin me objekt “Loti 2: Shërbim Lavanderie për Spitalin Rajonal Berat”.
OBP e ka njoftuar tenderin në qershor dhe gjatë kësaj kohe ka dorëzuar ofertë vetëm firma UNIVERS SERVIS, në pronësi të Plarent Gjinarit.
Nuk e dimë nëse është gabim shpejtësie, por kemi vërejtur disa parregullsi në dokumente që krijojnë mundësi për keqinterpretimin e kontratës.
Shohim që data e shpalljes së garës është më datë 7 qershor 2024, ndërsa data e fundit për dorëzimin e ofertave është shënuar më 11 tetor, por mbajta e tenderit është bërë më 15 gusht 2024.
Po si mund të bëhet zhvillimi i tenderit para se të mbyllet afati për dorëzimin e ofertave?!
Që këtu tregohet se komisioni i Gonxhes ka qenë me nxitim dhe nuk ka vepruar sipas rregullave me tenderët.
Shkelje tjetër është që njerëzit e Gonxhes në OBP kanë vazhduar procedurat edhe pse kishte një ofertë të vetme. Por kjo nuk ka rëndësi kur fituesi është i paracaktuar. Madje i jepet kontrata megjithëse oferta është me vlerë sa 100% e fondit limit.
Kështu u regjistruan edhe dy shkelje të tjera, pranimi i ofertës së shtrenjtë dhe mbyllje tenderit pa konkurrencë.
Më datë 15 tetor 2024, Open Data Albania e vlerësoi tenderin automatikisht me Flamurin e Kuq, që është shenja e riskut të korrupsionit. Këtë kontratë Gjinari angazhohet për 2 vjet. Ndërkohë 3 kontratat e tjera i ka përfituar Kristinka Leka me firmën Devis SHPK.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet .nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post