Policia ka arritur të zbardhë ngjarjen e ndodhur dy ditë më parë në Shkodër, ku tre shtetas të prezantuar si ukrainas arritën të vidhnin 140.000 euro nga një pikë shërbimesh.
Autoritetet shqiptare kanë arritur të identifikojnë tre personat që mashtruan pronarin e pikës së këmbimit valutor rreth orës 18:00 të së premtes, si shtetas gjeorgjinaë dhe nisën menjëherë punën për lokalizimin dhe arrestimin e tyre.
Blutë zbuluan se autori kryesor i grabitjes kishte udhëtuar drejt kryeqytetit të Bosnje dhe Hercegovinës, e më pas prej andej kishte fluturuar në drejtim të Turqisë.
“Më datë 09.08.2024, rreth orës 18:00, në sheshin Zdrale, Shkodër, këta shtetas, nëpërmjet mashtrimit, i kanë marrë pronarit të një pike të këmbimit valutor, shtetasit E. I., shumën prej 140 000 euro dhe më pas janë larguar menjëherë nga Shqipëria. Si rezultat i veprimeve intensive hetimore të kryera nga Sektori për Hetimin e Krimeve Ekonomike dhe Financiare në DVP Shkodër, pas kallëzimit nga pronari i një exchange, se 3 shtetas e kishin mashtruar në exchange, duke i marrë një shumë parash në euro, u bë i mundur identifikimi i 3 autorëve të dyshuar. Në vijim të veprimeve të thelluara, Departamenti i Policisë Kriminale në DPPSH, nëpërmjet strukturës së specializuar në varësi të tij, bëri të mundur zbulimin e itinerarit të autorit kryesor të dyshuar për këtë ngjarje, i cili po lëvizte nga Sarajeva në Stamboll me destinacion kryeqytetin e Gjeorgjisë.”
Pas zbulimit të itineratit të tij, në koordinim me policinë turke u krye edhe arrestimi i 40-vjeçarit në aeroportin e Stambollit. Menjëherë pasi është vënë në pranga, policia turke ka kryer procedurat e nevojshme dhe grabitësi gjeorgjian është ekstraduar paraditen e së dielës drejt Tiranës.
“Në kuadër të operacionit policor “TRACKING”, policia turke, bazuar në informacionin e marrë nga Policia Shqiptare e cila kishte ndjekur lëvizjet e autorit të dyshuar, bëri të mundur kapjen e shtetasit K. J., 40 vjeç, i cili është deportuar në Rinas mesditën e sotme. Në momentin e kapjes në aeroportin e Stambollit, Policia Turke, gjatë kontrollit fizik, i gjeti me vete një shumë prej 7500 euro.”
Autoritet në Shqipëri sqarojnë se kanë lokalizuar edhe dy grabitësit e tjerë gjeorgjianë dhe po punohet me njësitë policore të shteteve partnere për arrestimin e tyre.
“Po në vijim të hetimeve të thelluara nga Departamenti i Policisë Kriminale, nëpërmjet strukturës së specializuar në varësi të tij, në bashkëpunim me DVP Shkodër, është bërë i mundur edhe lokalizimi i dy autorëve të tjerë, dhe bashkëpunohet ngushtësisht me homologët për kapjen e tyre. Në vijim të veprimeve, janë shpallur në kërkim edhe dy autorët e tjerë të dyshuar, shtetasit gjeorgjianë G. T., 45 vjeç dhe B. T., 36 vjeç, për veprat penale “Mashtrimi” i kryer në bashkëpunim.”
Discussion about this post