Një grabitje dramatike në Muzeun e Luvrit ka detyruar mbylljen e papritur të muzeut më të vizituar në botë, duke shkaktuar panik te turistët dhe një operacion të madh policor në zemër të Parisit.
Hetuesit e përshkruajnë sulmin si një operacion të planifikuar me kujdes. Ngjarja ndodhi të dielën në mëngjes, pak pas hapjes së muzeut. Sipas burimeve policore të raportuara nga Le Parisien, grabitësit hynë nga ana e lumit Seine, ku po zhvillohen punime ndërtimi.
Ata përdorën një ashensor ngarkese që çonte direkt në dhomën e ekspozimit ku ruheshin bizhuteritë, dhe dy prej tyre thyen dritaret për të hyrë, ndërsa një i tretë qëndroi jashtë. U vodhën nëntë copë nga koleksioni i Napolonit dhe Joséphinës, përfshirë një varëse dhe një brosë.
Turistët përshkruan skena konfuzioni dhe paniku gjatë evakuimit të muzeut. Një vizitor nga Britania tregoi për The Sun: “Radhët ishin të gjata kur na thanë se muzeu do të mbyllej sepse dikush kishte tentuar të vidhte diçka brenda. Më pas erdhën forca policore dhe nisi evakuimi. Ishte kaos, por disa njerëz vazhdonin të bënin selfie ndërsa policia i largonte. Ishte një prani e madhe ushtarake dhe policore.”
Një tjetër vizitor britanik shtoi: “Ngjarja ishte si skenë nga filmi The Da Vinci Code. Ishte emocionuese dhe plot mister, edhe pse na zhgënjeu që nuk mundëm të hynim. Sirenat ishin me zë të lartë për rreth 30 minuta dhe askush nuk e dinte se çfarë po ndodhte.”
Hetimet po vazhdojnë për të zbuluar se si grabitësit hynë në një nga vendet më të sigurta kulturore në Evropë. Muzeu i Luvrit është simbol global i kulturës franceze dhe strehon kryevepra të njohura si Mona Lisa dhe Venera e Milos.
Me rreth 8 deri në 9 milionë vizitorë në vit dhe mbi 380,000 objekte në koleksion, Luvri konsiderohet një nga muzeumet më të ruajtura në botë, me vlerë që arrin miliarda paund.
Grabitja e fundit në Luvër nuk është e vetmja në historinë e Parisit. Në vitin 1911, Mona Lisa u vodh nga një punonjës i muzeut dhe u rikthye vetëm dy vjet më vonë.
Në nëntor 2024, grabitës me sëpatë vodhën nga Musée Cognacq-Jay shtatë kuti të rralla, ndërsa në 2010 humbën pesë kryevepra nga Picasso dhe Matisse në Muzeun e Artit Modern në Paris. Pesë grabitësit u dënuan me burgim në 2017.
Ministrja e Kulturës e Francës, Rachida Dati, tha në X: “Një grabitje ka ndodhur këtë mëngjes në hapjen e @MuseeLouvre. Nuk ka lëndime për t’u raportuar. Jam në vendngjarje së bashku me ekipet e muzeut dhe policinë. Hetimet po vazhdojnë.”
Ngjarja e fundit tregon se edhe muzeumet më të sigurta janë të prekshme ndaj krimit të organizuar, duke ngritur pyetje serioze mbi sigurinë e thesareve kulturore në botë.
Discussion about this post