Një vjedhje spektakolare ka ndodhur në orët e para të ditës së hënë, më 4 gusht 2025, në një vilë luksoze brenda kompleksit “Valamar” në Gjirin e Lalzit. Vila, e cila i përket një emigranti shqiptar, ishte e kyçur dhe bosh, çka i ka bërë hajdutët të veprojnë pa u shqetësuar.
Ajo që e bën këtë ngjarje më të pazakontë është “kodi i heshtjes” që ka rrethuar rastin. Policia dhe Prokuroria e Durrësit janë treguar tërësisht inaktive, duke mos dhënë asnjë informacion paraprak rreth vjedhjes, pavarësisht gravitetit të saj. Kjo heshtje është vënë në kontrast të thellë me deklaratat e shpeshta të autoriteteve për masat e sigurisë gjatë sezonit turistik.
Mbi të gjitha, ngjarja ngre dyshime serioze mbi efikasitetin e shërbimit të sigurisë private, “Arb Security”, i cili operon 24 orë në kompleks. Rruga ku ndodhet vila e grabitur ndodhet pikërisht përballë lokalit të njohur “Bedouni Beach Bar”, i cili administrohet nga Flladi Agolli, djali i Drejtorit të Fondit Shqiptar të Zhvillimit, Dritan Agolli.
Dyshohet se autorët e grabitjes mund të kenë qëndruar në këtë lokal para se të kryenin vjedhjen. Pavarësisht kësaj, dhe faktit që kamerat e sigurisë së lokalit mund të ndihmonin në identifikimin e autorëve, autoritetet nuk kanë ndërmarrë veprime për të kryer kontrolle. Ky rast evokon kujtime të tjera të ngjashme, si vjedhja e vilës së ish-drejtorit të SPAK-ut, Arben Kraja, në vitin 2021, ku autoritetet gjithashtu u treguan hezituese në dhënien e informacionit.
Discussion about this post