Grabiti argjendarinë e ish-gruas në Gjirokastër, ekstradohet nga Greqia

Policia e Shtetit ka raportuar ekstradimin nga Greqia të një personi të shpallur në kërkim nga drejtësia shqiptare që prej vitit 2021.

Në kuadër të operacionit të koduar “The Wanted” është ekstraduar nga Greqia në Shqipëri shtetasi Armando Mevlani, 45 vjeç. Ai akuzohet se në bashkëpunim me një shtetas të tjetër, ka vjedhur bizhuteri në një argjendari në Gjirokastër, duke kanosur shitësin me armë zjarri.

“Ky shtetas ishte shpallur në kërkim ndëkombëtar pasi Gjykata e Gjirokastrës, me vendimin e datës 14.04.2021, i ka caktuar masën e sigurisë “Arrest në burg”, për veprën penale “Vjedhja me armë”, kryer në bashkëpunim.” – thuhet në njoftimin e Policisë.

Armando Mevlani akuzohet se më datë më 31 Mars të vitit 2021, në bashkëpunim me një shtetas tjetër, ka vjedhur bizhuteri në një argjendari, në lagjen “18 Shtatori” të Gjirokastrës.

Në momentin e grabitjes, si shitëse në argjendari ishte ish-bashkëshortja e Armando Mevlanit. Ai së bashku me një person tjetër, janë futur të maskuar dhe të armatosur me armë zjarri. Nën kërcënimin e armës, ata kanë marrë sendet me vlerë nga argjendaria dhe janë larguar nga dyqani me një automjet tip “Golf”, ngjyrë të bardhë.