Një 25-vjeçar shqiptar ka humbur jetën ndërsa 1 tjetër mbeti i plagosur, pas një tentative grabitjeje të dështuar në Itali.
Ngjarja e rëndë ndodhi në një shtëpi në Foria di Centola, ndërsa mësohet se mes pronarit të banesës dhe 3 shqiptarëve pati një përplasje me armë zjarri.
Pas 48 orësh kërkime, trupi i pajetë i të riut u gjet në zonën e Limazzo-s, në San Severino di Centola. Oficerët e policisë ishin duke kërkuar të riun, me dron dhe qen ndërsa 30 persona, anëtarë të familjes dhe partnerja e tij morën pjesë në kërkimin e të riut.
Trupi i pajetë u gjet orët e para të mëngjesit. Ai dyshohet se u qëllua me armë zjarri, çifte nga pronari i shtëpisë ku hyri për të grabitur rreth orës 22:00 të së dielës në mbrëmje. Bëhet me dije se një armë ishte vjedhur gjithashtu nga shtëpia, ndoshta e përdorur nga i riu për t’iu përgjigjur sulmit me armë.
Mbetet e paqartë se kush hapi zjarr i pari, shqiptari apo pronari i shtëpisë, ndërsa nën hetim është edhe shoku i tij i cili mbeti i plagosur dhe ndodhet në spitalin Cardarelli. Ndërsa një person I tretë është në arrati, pasi arriti të largohet nga vendi i ngjarjes.
Ndaj trupit të të riut do të kryhet autopsia për të sqaruar shkaqet e sakta të vdekjes, ndërsa familjarët dhe miqtë e viktimës ndodhen prej orësh në vendngjarje dhe kërkojnë drejtësi për vdekjen e 25-vjeçarit. Mes lotëve dhe akuzave, ata bëjnë thirrje: “drejtësi për djalin”, ndërsa policia po përpiqet të ruajë qetësinë dhe rendin publik.
Ende nuk është zbardhur identiteti i tre të rinjve të përfshirë në këtë ngjarje.
Raportohet se viktima nuk kishte të kaluar kriminale, ndërsa ai la pas edhe një vajzë trevjeçare. Trupi u gjet në një përrua dhe ishte i mbuluar me çarçafë, gjë që ngre dyshimet se shqiptari mund të jetë transportuar atje nga dikush dhe më pas është fshehur.
Pronari i shtëpisë ku hajdutët kishin arritur të hynin tani po hetohet për vrasje të paqëllimshme dhe fshehje të një kufome. Sipas raporteve fillestare, ai e ka pranuar krimin këtë mëngjes, duke lehtësuar kërkimin.
Discussion about this post