Një 12-vjeçar ka rënë në prangat e policisë në Mat. Ai i ka grabitur një shumë prej 1.7 milionë lekësh një të moshuari. Mësohet se autori i mitur ka hyrë në banesën e shtetasit Shaqir Barjoti 66 vjeç, banues në fshatin German të Burrelit dhe i ka marrë paratë.
Uniformat blu po punojnë për identifikimin e personave që e kanë nxitur 12-vjeçarin për të kryer vjedhjen.
Njoftimi i policisë:
Mat/Specialistët për Hetimin e Krimeve të Komisariatit të Policisë Mat, në bashkëpunim me Prokurorinë e rrethit Mat, pas kallëzimit nga shtetasi Shaqir Barjoti, 66 vjeç, banues në fshatin German, Burrel, për vjedhjen pa thyerje, të shumës 170 000 lekë të rinj, në banesën e tij, kanë kryer veprimet hetimore për zbardhjen e kësaj ngjarjeje.
Si rezultat i veprimeve hetimore është identifikuar dhe shoqëruar një shtetas i mitur 12 vjeç. Si autor i dyshuar i vjedhjes së shumës së parave, në banesën e 66-vjeçarit, më datë 16.11.2022. Kjo ngjarje është publikuar në web-in zyrtar të Policisë së Shtetit, më datë 17.11.2022.
Shtetasi i mitur, pas marrjes në pyetje në prani të psikologut, prindit dhe prokurorit, është lënë i lirë.
Strukturat hetimore të Komisariatit të Policisë Mat, në bashkëpunim me Prokurorinë, vijojnë punën për dokumentimin e plotë të këtij rasti. Dhe identifikimin e personave që e kanë nxitur 12-vjeçarin, për të kryer vjedhjen.
Materialet procedurale i kaluan Prokurorisë pranë Gjykatës së Rrethit Gjyqësor Mat, për veprime të mëtejshme.
Discussion about this post