Zyra e Prokurorit Publik Evropian (EPPO) në Athinë ka ngritur akuza penale ndaj 22 personave, përfshirë katër deputetë në detyrë, ish-zyrtarë publikë dhe bashkëpunëtorë politikë, në kuadër të hetimeve për një skemë të dyshuar mashtrimi në menaxhimin e fondeve bujqësore përmes Organizatës Greke për Pagesat dhe Kontrollin e Ndihmës Komunitare (OPEKEPE).
Sipas njoftimit të EPPO-së, akuzat ndaj shtatë deputetëve të tjerë në detyrë janë tërhequr për shkak të mungesës së provave të mjaftueshme. Institucioni nuk ka bërë publikë emrat e deputetëve të përfshirë.
Hetimi lidhet me veprime të dyshuara të kryera gjatë vitit 2021. Më 24 prill, Parlamenti grek miratoi kërkesën e Prokurorit Publik Evropian për heqjen e imunitetit parlamentar të 11 deputetëve, duke i hapur rrugë vazhdimit të hetimeve.
Sipas EPPO-së, hetimet kanë zbuluar praktika të përsëritura korruptive në administrimin e subvencioneve të Politikës së Përbashkët Bujqësore (CAP). Gjetjet përfshijnë ndërhyrje të paligjshme në procedurat administrative dhe të kontrollit, ndryshime prapavepruese të të dhënave pas përfundimit të kontrolleve të detyrueshme, manipulim të kontrolleve në terren, fshehje ose ndryshim të rezultateve të inspektimeve, si dhe përdorimin e certifikatave të rreme.
Në të njëjtin rast, EPPO ka ngritur akuza edhe ndaj ish-presidentit të OPEKEPE për pesë vepra të dyshuara të shkeljes së besimit, ndaj ish-drejtorit të Drejtorisë së Ndihmës Direkte për dy akuza të ngjashme, si dhe ndaj dy ish-drejtorëve rajonalë të institucionit për shkelje të besimit dhe menaxhim të paligjshëm të fondeve të Bashkimit Evropian.
Nga katër deputetët e akuzuar, tre dyshohen për nxitje të shkeljes së besimit, ndërsa i katërti akuzohet për nxitje të përvetësimit të fondeve evropiane. Ky i fundit përballet gjithashtu me akuza shtesë për nxitje në deklarim të rremë dhe tentativë mashtrimi.
Sipas legjislacionit grek, nëse shpallen fajtorë, të pandehurit mund të dënohen me deri në pesë vjet burg, si dhe me gjobat e parashikuara nga ligji. EPPO thekson se të gjithë të akuzuarit prezumohen të pafajshëm deri në një vendim gjyqësor të formës së prerë.
Prokuroria Publike Evropiane njoftoi gjithashtu se hetimet vazhdojnë për persona të tjerë të përfshirë në çështjen OPEKEPE, mes tyre edhe tre ish-deputetë. Paralelisht, janë në zhvillim edhe hetime të tjera për raste të dyshuara të lidhura me këtë skandal, të kryera në periudha të ndryshme, pa u dhënë detaje të mëtejshme për të mos cenuar ecurinë e procedurave hetimore.
Discussion about this post