Një ngjarje e rëndë ka ndodhur mëngjesin e së premtes në Lavrio, rreth 50 kilometra në jug të Athinës, ku një 32-vjeçar rumun ka plagosur me thikë ish-gruan e tij dhe partnerin e saj aktual. Sipas mediave greke, autori ka hyrë në banesën e çiftit pasi ka thyer një dritare dhe ka sulmuar ish-gruan e tij 32-vjeçare dhe partnerin e saj, 33-vjeçarin me origjinë shqiptare Klevis Tite.
Gruaja ka marrë plagë në shpinë dhe ndodhet në gjendje të rëndë, ndërsa Tite ka pësuar dëmtime në duar dhe në zonën gjenitale dhe është transportuar në spitalin Asklipio. Ngjarja ka ndodhur në prani të dy fëmijëve të mitur të ish-çiftit, 1 dhe 2 vjeç, të cilët janë marrë në kujdes nga psikologët në gjendje shoku. Sipas raportimeve, gruaja e kishte denoncuar të paktën pesë herë ish-bashkëshortin për dhunë dhe kërcënime dhe ndaj tij ishte vendosur edhe një sistem alarmi “panic button”.
Situata është parandaluar nga ndërhyrja e një banori të zonës, i cili ndodhej pranë banesës, ndërhyri për të ndihmuar viktimat dhe njoftoi policinë. Forcat e rendit mbërritën në vendngjarje brenda pak minutash dhe arrestuan autorin. Ai pritet të dalë përpara gjykatës, ku do të vendoset masa e sigurisë ndaj tij.
Discussion about this post