Greqia nuk heq dorë nga kërkesa e saj për lirimin e Fredi Belerit, i cili në 14 maj mori mandatin e Kryebashkiakut të Himarës, edhe pse dy ditë para zgjedhjeve u arrestua nga policia me akuzën e blerjes së votave.
Megjithëse aktualisht në shtetin helen ka një qeveri me mandat të përkohshëm deri në zhvillimin e zgjedhjeve parlamentare, Vassilis Kaskarelis, ministër i Jashtëm i Greqisë, po planifikon të takohet me ministren e Punëve të Jashtme të Shqipërisë, Olta Xhaçka, në Samitin joformal të Ministrave të Jashtëm të NATO-s në Oslo.
Mediat greke raportojnë se Kaskarelis pritet të kërkojë lirimin nga qelia të kryetarit të zgjedhur të Bashkisë Himarë, Fredi Beleris dhe bashkëpunëtorit të tij, Kokaveshi.
Në të njëjtën kohë, sipas burimeve kontradiktore, ministri i Jashtëm grek është në komunikim të vazhdueshëm me ambasadoren greke në Shqipëri, Konstantina Kamitsi , për t’u informuar vazhdimisht, ndërkohë që jepen udhëzimet e duhura për trajtimin e këtij problem, që po trajtohet si një rast specifik.
Vihet re se, pas udhëzimeve përkatëse, ambasadori grek është takuar së fundmi me të dy të burgosurit dhe është në komunikim të vazhdueshëm me të afërmit dhe avokatët e tyre.
Discussion about this post