Janë zhvilluar mbrëmjen e së enjtes gjashtë sfidat gjysmëfinale në play-off kualifikues për tre biletat e mbetura për në grupet e Euro 2024. Formati është i thjeshtë, 12 skuadra dhe gjashtë çifte në përballjet direkte që në fund nxorën gjashtë skuadrat që do luajnë në duelet finale të play-offit.
Uellsi, Polonia, Ukraina, Islanda dhe Greqia janë skuadrat të cilat i janë bashkuar Gjeorgjisë në finalet e play-off të Euro 2024. Këto skuadra do të luajnë në javën e ardhshme për tre vendet që mbeten bosh për aktivitetin e kësaj vere në Gjermani.
Pesë gjysmëfinalet e luajtura kanë regjistruar në total 24 gola, kryesisht falë goleadave të Polonisë, që mundi 5-1 Estoninë, dhe Greqisë që mundi 5-0 Kazakistanin, në ndeshje që u luajtën praktikisht me një kah të vetëm.
Ndërkohë, fitore të thellë arriti në fushën e vet edhe Uellsi, kurse surprizat u bënë nga dy skuadra në transfertë.
Islanda fitoi me përmbysje me shifrat 4-1 ndaj Izraelit në ndeshjen në fushën neutrale të Budapestit, duke siguruar një vend në finale.
Kurse Ukraina ishte vetëm pak minuta larg eliminimit, para se të kthente në fund të sfidës rezultatin përballë Bosnjë Hercegovinës, për suksesin 2-1.
Fituesi i Ligës A (Uells-Poloni) do të jetë pjesë e grupit D në Euro 2024 (Holandë, Francë, Austri).
Fituesi i Ligës B (Ukrainë-Islandë) do të jetë pjesë e grupit E në Euro 2024 (Belgjikë, Sllovaki, Rumani).
Fituesi i Ligës C (Gjeorgji-Greqi) do të jetë pjesë e grupit F në Euro 2024 (Portugali, Turqi, Republikë Çeke).
Discussion about this post