Greqia përshëndeti dhe uroi fillimin e negociatave të pranimit të Shqipërisë dhe Maqedonisë së Veriut me Bashkimin Evropian dhe shprehu mbështetjen e saj për këtë proces të vështirë por shumë të dobishëm.
Sipas mediave greke, mesazhin e mbështetjes e dha zëvendësministri i Jashtëm grek Miltiadis Varvitsiotis në një deklaratë gjatë mbledhjes së djeshme të Konferencës së parë Ndërqeveritare të BE-së me Shqipërinë dhe Maqedoninë e Veriut.
“Sot është një ditë shumë e rëndësishme si për Evropën ashtu edhe për Greqinë. Me fillimin e negociatave për anëtarësimin e Maqedonisë së Veriut dhe Shqipërisë në Bashkimin Evropian, përfundon një cikël, një cikël që filloi në Selanik ku në vitin 2003 u vendos që Bashkimi Evropian të hapte dyert për vendet e Ballkanit Perëndimor. Për ne është shumë e rëndësishme të vijojmë me shpejtësi këto negociata të anëtarësimit, të cilat do t’i japin përmbajtje dhe plotësim kërkesave bazë kombëtare, pra zbatimit besnik të marrëveshjes së Prespës, por edhe të drejtave të minoritetit grek në Shqipëri, si kombëtare ashtu edhe prone”, tha ai.
Në të njëjtën kohë, ai vuri në dukje se është e rëndësishme që Greqia të fitojë fqinjë në kufijtë e tij veriorë, fqinjë evropianë me të cilët do të ndajë të njëjtat vlera, të njëjtat parime, të ulet në të njëjtën tryezë dhe natyrisht të ketë një ekonomi të qetë dhe marrëdhëniet politike duke nënvizuar rëndësinë e çuarjes përpara të negociatave sa më shpejt.
Në fund, zëvendësministri përgëzoi personalisht kryeministrin e Shqipërisë, Edi Rama dhe kryeministrin e Maqedonisë së Veriut, Dimitar Kovacevski, të cilët morën pjesë në këtë konferencë historike, duke falënderuar edhe presidencën çeke dhe atë franceze, të cilat kontribuuan ndjeshëm në heqjen e ngërçeve dhe lejoi që Konferenca e parë Ndërqeveritare të zhvillohej në kuadrin e procesit të ri të zgjerimit.
Discussion about this post