Pano Ruçi nuk e ka ndalur grevën e tij të urisë përpara parlamentit grek në qendër të Athinës. Prej 7 ditësh, shqiptari qëndron në shesh duke kërkuar zbardhjen e së vërtetës për vdekjen e djalit të tij, Denisit, në aksidentin hekurudhor të Tempit më 28 shkurt 2023.
“Kjo nuk është ajo që dua. Unë do të vazhdoj luftën time, nuk ndalem. Siç e kam thënë që nga dita e parë: ata engjëj të vegjël atje lart duan drejtësi, dhe unë nuk do ta lë kështu. Deri sa gjithçka të bëhet siç duhet,” ka deklaruar Pano Ruçi për mediat greke.
Protesta e shqiptarit ka zgjuar vëmendje të madhe në vendin fqinj, pasi qindra qytetarë shkojnë çdo ditë përpara tij për të shprehur solidaritet. Pas tij, edhe familjarë të tjerë të viktimave kanë kërkuar zhvarrosjen e të afërmve të tyre.
Në aksidentin e dy viteve më parë, përplasja e dy trenave shkaktoi vdekjen e 57 personave, mes të cilëve edhe 6 të rinj me origjinë shqiptare.
Discussion about this post