Vehap Kola
Të kërkosh rritjen e pagave nga një kryeministër që e urren dijen është njësoj si të kërkosh ushqime në grumbullin e plehrave në Sharrë.
Edi Rama e ka dëshmuar vazhdimisht se ai e urren dijen dhe i nënçmon kërkuesit e saj. Dje ai u tall përsëri me grevën e pedagogëve duke i konsideruar ata më pak të ditur se gjyshja e tij e ndjerë e pashkolluar.
Vijimi i grevës së pedagogëve të universiteteve publike me kërkesën për të rritur pagat është një përpjekje që nuk do të japë fryte. Rama do të vazhdojë të tallet dhe të fyejë pedagogët sepse e ka të qartë se ata nuk kanë asnjë mekanizëm presioni pë ta detyruar qeverinë të pranojë kërkesat e grevës.
Çfarë dëmi i sjell bojkotimi i mësimit në universitet një qeverie që nuk i futet gjemb në këmbë as nga ikja e pandalshme e të rinjve? Kur një popull i tërë ka ulur kokën dhe secili kërkon një shteg për të ikur nga kjo çmendinë, bojkoti i mësimit shndërrohet më shumë në një lojë se sa dhimbje për studentët.
Të rinjtë e dinë se do të shtyhen nja dy javë provimet dhe ata do të hyjnë në sallë pa shumë kokëçarje për leksionet. Për ata që vërtet e vradin mendjen për procesin mësimor, Rama e ka gati arsyetimin: këta që sot janë në grevë janë fajtorët, madje ata nuk çanë kokë për kërkesat e studentëve në vitin 2018 dhe i lanë në baltë ata.
Prandaj edhe mundësia që grevës t’i bashkohen studentët është e vogël. Sepse është e vërtetë që ata nuk iu bashkuan protestave të studentëve në vitin 2018. Protestat e sotme të pedagogëve Rama i ka përçarë që atëherë kur arriti të fuste në mesin e kërkesave të studentëve edhe pakënaqësitë që kishin me stafet akademike të universiteteve të tyre.
E vetmja mënyrë që kanë pedagogët për ta nxjerrë grevën e tyre nga ky impass logjik është që të mos vazhdojnë të sillen si grup interesi por të fillojnë të përfaqësojnë interesat e gjithë qytetarëve. Përse nuk kërkojnë ata që pagat të rriten për të gjjthë administratën publike? Pse të mos rriten pagat edhe për mësuesit, mjekët, infermierët, policinë dhe nëpunësit e tjerë publikë? Mos ndoshta këta të tjerët kanë përfituar rritje të kënaqshme page gjatë dekadës së qeverisje Rama?
Nëse për 10 vite me radhë pedagogët nuk e kanë hapur gojën për pothuajse asnjë çështje të interesit publik, është koha që të dalin nga ky ngërç dhe të shlyejnë borxhin moral që i kanë shoqërisë si shqisa intelektuale e saj. Të thonë të vërtetën për interesin e qytetarëve dhe të mos ulin kokën përpara talljeve të Ramës. Të mos votojnë rektorë, dekanë e shefa departamentesh që qeshin kur i fyen kryeministri. Të mos qepin gojën përpara varfërisë dhe shpopullimit të plotë dhe të mos shohin kompensimin e trajtimit të munguar financiar tek rrugët banale të përfitimit nga studentët.
Nëse pedagogët nuk e bëjnë edhe sot detyrën që kanë ndaj vendit si intelektualë, ata vetëm dëshmojnë se janë bashkautorë të kësaj krize morale, ekonomike e sociale.
Discussion about this post