Një numër i madh shtetesh nga Amerika te Britania e Madhe duke kaluar nga Franca dhe Japonia kanë regjistruar humbje të shpendëve në shifra rekord si rrjedhojë e përhapjes së gripit të shpendëve gjatë vitit të fundit. Kjo sëmundje, për të cilën ekspertët thonë se po përhapet përmes zogjve shtegtarë, është përhapur për herë të parë edhe në Ekuador, Peru dhe Bolivi.
Rreziku për njerëzit është i vogël, sipas Tedros Adhanom Ghebreyesus, drejtorit të përgjithshëm të Organizatës Botërore të Shëndetit (OBSH). Si masë fillestare, njerëzit këshillohen të mos i prekin kafshët e egra të sëmura ose të ngordhura. Sipas të dhënave të OBSH-së, nga janari i 2003-shit e deri më 25 nëntor të vitit të kaluar, 868 njerëz nga 21 shtete të planetit kanë raportuar për infektim me gripin e shpendëve H5N1, lloji i virusit që po përhapet përreth globit. Nga këto, 457 raste apo 53 për qind kanë përfunduar me fatalitet.
Në janar, OBSH-ja raportoi për herë të parë për infektimin e një personi me virusin H5N1 në zonën e Amerikës Latine dhe Karaibet. Një vajzë nëntëvjeçare nga Ekuadori ishte infektuar pas një kontakti me shpezë shtëpiake. Ajo ishte shtrirë në spital më 18 janar, sipas agjencisë botërore.
Rastet e infektimit të njerëzve me këtë virus janë zakonisht si rezultat i ekspozimit ndaj shpezëve të infektuara të vdekura ose të gjalla dhe mjediseve jo optimale, thanë nga OBSH-ja. Që nga tetori i vitit 2020 janë vrarë shpendë në të paktën në 60 shtete si pjesë e masave të ndërmarra shkaku i përhapjes së këtij virusi, sipas të dhënave të ofruara për Reuters nga Organizata Botërore për Shëndetin e Kafshëve. Në mesin e këtyre shteteve raportohet se janë India, Tajvani, Nepali, Peruja, Çekia, Rumania dhe Nigeri.
Discussion about this post