Bashkëshortja e ish-kryeministrit britanik, Tony Blair ka vizituar Tiranën mbrëmjen e sotme. Cherie Blair po darkon me shefin e komunikimit të kryeministrit Edi Rama, Endri Fuga. Të dy ndodhen në një restorant që gatuan kryesisht receta italiane, pas Piramidës, në rrugicën ngjitur me të njohurën e shumë të frekuentuarën në kryeqytet “Mustafa Matohiti”.
Cherie Blair dhe Endri Fuga janë të shoqëruar nga zyrtarë të ministrisë për punët e jashtme, identitetet e të cilëve nuk bëhen me dije. Kjo vizitë e gruas së ish-kryeministrit britanik dhe kjo darkë po mbahet e fshehtë, pasi asnjë prej të pranishmëve nuk ka bërë asnjë postim publik në rrjetet sociale, ndryshe nga herët e tjera kur vetë kryeministri kujdeset që ‘gostitë’ me të ardhurit t’i prezantojmë e publikun.
Rrugica ku ndodhet restoranti pritës është boshatisur e gjitha dhe të vetmit banorë të saj për këtë mbrëmje janë zonja Blair, Fuga dhe zyrtarët e ministrisë.
Tony Blair njihet për mbështetjen që i ka dhënë kryeministrit Edi Rama. Më herët ai u prit në Maqedoninë e Veriut nga Zoran Zaev dhe komentoi pozitivisht nismën “Ballkani i Hapur”. Tetë vite më parë, Rama vuri në dispozicion të tij këshillimet e ish-kryeministrit britanik dhe të drejtorit të komunikimit të tij, Alastair Campbell. Në vitin 2015, Blair shtoi Serbinë në listën e vendeve nga të cilat paguhet si këshilltar.
