Miku e bënë gruan sekretaren e drejtorit, burrin doganier. E ëma drejtoreshë fut të bijën specialiste. Nami te Drejtoria e Doganave! Tashmë i konfirmon edhe KLSH punësimet nepotike të Gent Gazhelit. Pak kohë më parë në media u publikua skandali se si Drejtoresha e komanduar te Burimet Njerëzore tek Doganat me miratim të Gent Gazhelit kishte emëruar të bijën si specialiste në Departamentin e anti-korrupsionit tek Doganat. Një rast i paprecedentë në të gjithë administratën shqiptare kur mamaja drejtoreshë promovon të bijën. Përgjegjësja e sektorit të pagesave, futi të bijën si doganiere te “Aposteriori 5 ditor”. Burrin e sekretares së tij, Gazheli e ka emëruar doganier fizik në doganën e Tiranës. Asaj kohe Drejtoria e Doganave pranoi që janë bërë këto emërime, por tha se firmat janë hedhur para se të vinte Gent Gazheli në krye të institucionit. Por, faktet e publikuara nga Kontrolli i Lartë i Shtetit përmes një raporti pas auditim në këtë institucion flasin ndryshe.
Kujtojmë se, Gent Gazheli është emëruar si Drejtor i Përgjithshëm i Doganave me datë 30 shtator 2020. Ndërsa, auditimi i KLSH-së ka përfunduar në fund të vitit 2021 dhe ka evidentuar se punësime të tilla pa garë dhe me drejtim nepotik ka pasur edhe në periudhën nga viti 2020 deri në 2021. Në raportin e KLSH-së thuhet se vetëm gjatë vitit 2021 janë emëruar pa konkurrim 3 punonjës. Ndërkohë për 11 punonjës të tjerë nuk janë dorëzuar dokumentet informuese dhe verifikuese, çka tregojnë se kjo është rruga që ndiqet në Dogana për të futur në punë miqtë e drejtorëve.
“Në 3 raste në vitin 2021, nuk është zhvilluar nga ana e DPD-së asnjë procedurë shpallje, verifikimi apo konkurrimi, por është lidhur kontrata individuale e punës në mënyrë të menjëhershme. Në 11 raste, nga këqyrja e dokumentacionit të kandidatëve të shpallur fitues, ka rezultuar se, nuk është dorëzuar dokumentacioni vërtetues i kërkesave të përgjithshme dhe po në 11 raste, janë pranuar dokumente përtej datës së vendosur në njoftimin për shpallje konkurrimi”, thuhet në raport.
Transferime në shkelje të ligjit
Ndër të tjera KLSH evidenton se më së shumti gjatë vitit 2021 janë bërë lëvizje nga postet në shkelje të ligjit. Si duket Gazheli ka ngritur në detyrë miqtë e tij më afërt, familjarët e tyre dhe ka ulur në detyrë punonjësit e tjerë. Ka edhe transferime punonjësish në shkelje të ligji, duke shkaktuar 2,614,482 lekë dëm ndaj buxhetit.
“Nga auditimi konstatohet se në 5 raste, transferimi është realizuar në kundërshtim me legjislacionin në fuqi, pasi janë realizuar transferime nga pozicion pune, pa status të shërbimit civil në administratën doganore në pozicion pune me status nëpunësi civil, si dhe janë realizuar transferime nga pozicion me status nëpunësi civil në pozicion pune pa status të shërbimit civil në administratën doganore. Nga auditimi konstatohet se në 74 raste për vitin 2021, transferimi është realizuar për një periudhë me kohëzgjatje mbi 6 muaj në kundërshtim me legjislacionin në fuqi (Ligji “Për nëpunësin civil” dhe Kodin Doganor në RSH)”, thuhet në raport.
Më tutje sqarohet se në 34 raste, në këto transferimie punonjësi ka lëvizur në një kategori më të lartë, duke fituar pagën më të lartë midis dy kategorive, në kundërshtim me ligjin.
Largime të padrejta nga puna
Jo vetëm kaq, KLSH raporton se me ardhjen e Gazhelit në krye të Doganave janë bërë një valë largimesh të padrejta nga puna. Normal, se ky i fundit po bënte gati karriget për miqtë e tij. Vetëm gjatë viti 2021 janë shkaktuar 18 milionë lekë dëme financiare për heqjet e padrejta nga puna.
“Shuma e likuiduar përgjatë vitit 2021, për ish punonjësit e larguar nga puna, si rezultat i ekzekutimit të vendimeve gjyqësore të formës së presë, ka rezultuar në shumën 18,856,179 lekë. Shpenzimet për ekzekutim të vendimeve gjyqësore “Për largim nga puna/dhe ose shërbimi civil” për vlerën e cituar më lart, konsiderohen shpenzime të panevojshme, si rrjedhojë e veprimeve të paligjshme të institucionit. Përdorimi i këtyre fondeve buxhetore për paga të punonjësve, të cilat nuk kanë punuar për periudhën që janë paguar duke rënduar shpenzimet e vitit 2021, janë cilësuar si shpenzime pa efektivitet, eficent”, thekson KLSH.
Po ashtu, konstatohet se ka pasur edhe miliona lekë dëme të regjistruara në 2020. Kësisoj, KLSH konstaton se vlera prej 20,211,684 lekë, paguar për fituesit e gjyqeve për vitin 2020 dhe shpenzimet për shërbimin përmbarimor./ Esmerald Hida/
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post