Kryebashkiaku i Vorës, Gentian Picari do të hetohet përsëri nga SPAK. Vendimi për rinisjen e hetimeve për kryebashkiakun e Vorës i ka dhënë Gjykata Kundër Krimit dhe Korrupsionit, e cila detyron SPAK-un që të bëjë hetime të thelluara për akuzat që koordinatori i LSI, Vojo Bregu bëri gjatë zgjedhjeve.
Picari është kallëzuar penalisht për veprat penale të “Korrupsionit aktiv në zgjedhje”, “Shpërdorim detyre” dhe “Grup i strukturuar kriminal”. Në kallëzim thuhet se Picari kishte bërë punësime të paligjshme në administratë në 73 raste, si dhe kishte urdhëruar rivlerësim abuziv për 43 shtëpi të dëmtuara nga tërmeti, duke rënë në kundërshtim me ligjin dhe me vendimin e KQZ për të pezulluar punësimet deri në ditën e zgjedhjeve.
Pas marrjes në shqyrtim të kallëzimit, SPAK mbylli hetimet për kryebashkiakun socialist dhe depozitoi në GJKKO kërkesën për mos-kalimin e dosjes për gjykim. Mirëpo, gjyqtarët e posaçëm kanë rikthyer dosjen në SPAK dhe e kanë urdhëruar këtë të fundit të bëj hetime të thelluara.
Sipas GJKKO, SPAK nuk ka vlerësuar faktin që me firmë të kryebashkiakut Picari është kryer shtimi i administratës me 73 punonjës, veprim ky në kundërshtim me ligjin dhe vendimin e KQZ-së të muajit dhjetor për të bllokuar të gjitha emërimet e reja deri pas zgjedhjeve.
Ndërsa sa i përket kallëzimit të dytë në lidhje me riklasifikimin e objekteve të dëmtuara nga tërmeti, Gjykata ka urdhëruar SPAK që të bllokojë të gjitha dosjet e reja me vendimet e grupeve të ngritura nga Gentian Picari, të cilët kanë bërë fryrje të faturave të dëmeve.
