Grupi i deputetëve mbështetës të Enkelejd Alibeajt ka mandatuar Gazment Bardhin për të negociuar me ish kryeministrin Sali Berisha dhe aleatët për të dalë me një kandidat të përbashkët në zgjedhjet lokale të vitit 2023.
Në një deklaratë të shpërndarë për mediat, bëhet me dije se deputetët mbështetës të Alibeajt kanë zhvilluar sot një takim, dhe në mënyrë unanime mësohet të kenë rënë dakord për të bashkëpunuar për zgjedhjet lokale me të gjitha forcat opozitare, përfshirë këtu edhe negociatat me grupin e Berishës.
Deklarata e grupit të Alibeajt:
Pas diskutimeve në Grupin Parlamentar të Partisë Demokratike, deputetët në mënyrë unanime shprehën vullnetin e plotë dhe të sinqertë për të gjetur format e duhura të bashkëpunimit për zgjedhjet lokale fillimisht duke nisur me të gjithë Partinë Demokratike dhe me çdo faktor opozitar.
Në vlerësimin e Grupit Parlamentar të PD zgjidhje e vetme për tu përballur me regjimin e Edi Ramës në zgjedhjet lokale është bashkimi i çdo zëri opozitar dhe përballja me një kandidat të vetëm të PD dhe opozitës në zgjedhje.
Me qëllim diskutimin e çdo mundësie të sinqertë për bashkëpunim, Grupi Parlamentar i Partisë Demokratike ka mandatuar zotin Gazment Bardhi për të kontaktuar dhe për të hulumtuar çdo mundësi bashkëpunimi dhe daljes në zgjedhje lokale me një kandidat të vetëm të PD dhe opozitës.
Grupi Parlamentar i PD shpreh gatishmërinë për të nisur që sot nga puna për të gjetur modalitetet e bashkëpunimit mes demokratëve në zgjedhjet lokale.
Discussion about this post