Tre personat e arrestuar në Shqipëri të akuzuar si pjesë e grupit që merrej me trafik droge në Francë janë lënë nën masën e sigurisë arrest në burg.
Redian (alias Refik) Doda, Zabit (alias Artur) Fisniku, Fabi Isaku akuzohen për veprat penale “Trafikim i lëndëve narkotike” kryer në bashkëpunim, në formën e grupit të strukturuar kriminal, “Grup i strukturuar kriminal”, si dhe “Kryerja e veprave penale nga organizata kriminale dhe grupi i strukturuar kriminal”.
GJJKO ka pranuar kërkesën e prokurorisë për tre të akuzuarit.
Koka e grupit dyshohet të jetë Redian Doda nga Durrësi.
“Gjatë periudhës gusht-dhjetor 2022, autoritetet franceze të drejtësisë kanë filluar një hetim paraprak në qarkun e Albertville, në lidhje me veprimet e një grupi kriminal të organizuar i cili është marrë me trafikun e drogës. Kjo strukturë ishte e vendosur në qarkun e Lionit dhe furnizonte grupet e shitjes të vendosura në qarkun e Savojës dhe Savojës së sipërme.
Juridiksioni ndërkrahinor i posaçëm i Lionit ka marrë përsipër dosjen dhe ka hapur një hetim gjyqësor, drejtimi i të cilit i është besuar Seksionit të Kërkimeve të Lionit. Hetimet bënë të mundur të vërtetohen dërgesat me lëndë narkotike pothuajse ditore tek grupet e shitjes në qarqet e Rhone, Ain, Savojë dhe Savojës së sipërme nga një nënshtetas shqiptar që jetonte në periferi të Lionit”, njoftoi SPAK.
Discussion about this post