Deputeti socialist Vullnet Sina i është përgjigjur Grupit Parlamentar të Partisë Demokratike, të cilët kërkuan që atij t’i hiqet mandati i deputetit me akuzat se ka përfituar nga buxheti i shtetit.
Në një reagim në mediat e tij sociale, Sina thotë se që nga viti 2017 ka hequr dorë nga administrimi i bizneseve të tij dhe se i është përkushtuar vetëm politikës.
Sina thekson se nuk ka përfituar nga buxheti i shtetit as kur nuk ka qenë deputet as pasi u zgjodh si ligjvënës.
Kujtojmë se Grupi Parlamentar i Partisë Demokratike, do t’i kërkojë Kuvendit që të dërgojë në Gjykatën Kushtetuese mandatin e deputetit socialist Sina .
Sipas demokratëve, deputeti socialist ka përfituar të ardhura nga “Buxheti i Shtetit, në vlerë disa milion lekë, përmes 9 kompanive të tij private, gjatë periudhës ku ushtron edhe mandatin e deputetit.”
Edhe pse thotë se ka hequr dorë nga administrimi i bizneseve, sipas të dhënave në Qendrën Kombëtare të Biznesit, Sina rezulton ende pronar i tyre.
Reagimi
Në reagimin në “FB”, Sina shkruan:
“Mësova me habi dhe jo pa humor, kërkesën për mocion të Partisë Demokratike për heqjen e mandatit tim si përfaqësues i Partisë Socialiste në Kuvendin e Republikës së Shqipërisë.
Gjobëvënësit mediatikë e përsërisin këtë këngë gjinkallash nga viti 2017. Por, surpriza është që thashethemet e portaleve përdoren nga opozita duke i kthyer në akte politike.
Per sa më sipër, deklaroj me përgjegjësi të plotë:
– Në zbatim të nenit 70, pika 3 e Kushtetutës, nga viti 2017 kam dhënë dorëheqje nga administrimi i të gjitha bizneseve të mia, duke iu përkushtuar vetëm politikës.
– Me vendimet e depozituara në QKB në vitin 2017, kam vendosur transferimin e të gjitha kuotave të kompanive, sipas ligjeve në fuqi.
– Nuk kam përfituar nga buxheti i shtetit asnjë lek, as kur nuk kam qenë deputet, as kur jam zgjedhur deputet.
Për më tepër, dhuroj prej vitesh rrogën mujore të deputetit për të ndihmuar njerëz në nevojë dhe as më shkon mendja të përfitoj financiarisht nga buxheti i shtetit.”
Discussion about this post