Deputeti Kreshnik Çollaku është distancuar nga një deklaratë e Grupit Parlamentar të PD-së, ku atakohej procesi i zgjedhjeve të 29 korrikut, ndërsa Lulzim Basha akuzohet se po ndërton një parti personale dhe me aktet e tij synon përçarjen e PD-së.
Çollaku në reagimin e tij shprehet se ëhstë jo korrekte dhe jo etike që në emër të Grupit të dalin deklarata që nuk përfaqësojnë gjithë grupin.
“Keqpërdorimi i deklaratave në emër të Grupit Parlamentar duhet të ndalet.
Në Grupin Parlamentar bëjmë pjesë të gjithë deputetët e PD.
Është fakt i njohur se brenda grupit për çështje të caktuara, që lidhen me zgjedhjet në PD ndajmë mendime e qëndrime të ndryshme.
Është krejt normale që kolegë deputetë individualisht apo në grup nominalisht mund të shprehin qëndrimet e tyre.
Është jo korrekte dhe jo etike që në emër të Grupit të dalin deklarata që nuk përfaqësojnë gjithë grupin e që për më tepër nuk janë as diskutuar me të gjithë grupin.
Duke qenë se kjo po bëhet një sjellje rutinë e përsëritur, ju bëj apel kolegëve ti bëjnë të tilla deklarata në emër personal dhe jo në emër të gjithë Grupit Parlamentar të PD, si kusht për të ruajtur respektin reciprok dhe kohezionin e Grupit”, shprehet Çollaku.
Discussion about this post