Një grup i dyshuar kriminal me përbërje shqiptare është goditur nga autoritetet spanjolle, pas një operacioni të Guardia Civil në Ishujt Balearë.
Tre persona janë ndaluar si të dyshuar për përfshirje në një seri vjedhjesh me forcë në vila luksoze dhe banesa të zonave elitare, ndërsa gjashtë persona të tjerë janë shpallur në kërkim.
Operacioni i koduar “Congre” u zhvillua më 15 korrik nga strukturat e Policisë Gjyqësore të Guardia Civil, me kontrolle në dy banesa në Cala Major të Palmës dhe në Santa Eugènia.
Gjatë bastisjeve, hetuesit sekuestruan para cash, dylbi, mjete pune, karta SIM dhe kamera, sende që dyshohet se përdoreshin për organizimin e grabitjeve të tjera.
Sipas hetimeve, grupi dyshohet se ka kryer më shumë se 22 vjedhje gjatë viteve 2025 dhe 2026 në zona rezidenciale me të ardhura të larta si Puerto de Andratx, Badia Gran, Costa d’en Blanes dhe Bendinat.
Autoritetet spanjolle dyshojnë se dëmi i shkaktuar nga këto grabitje kalon vlerën e 2 milionë eurove.
Hajdutët dyshohet se hynin në banesa duke thyer dyer dhe dritare ose duke përdorur mjete të posaçme.
Sipas Guardia Civil, sendet e vjedhura fshiheshin në vende të izoluara malore përpara se të transportoheshin, ndërsa anëtarët e grupit përdornin identitete të ndryshme për t’iu shmangur zbulimit.
Hetimi vijon ende, ndërsa autoritetet spanjolle pritet të kërkojnë urdhër-arreste evropiane për gjashtë personat e tjerë të dyshuar si pjesë e organizatës kriminale.
Grupi dyshohet se përbëhej nga gjithsej tetë persona të shpërndarë në vende të ndryshme të Evropës.
Discussion about this post