Ka nisur një procedim në gjendje të lirë për dy shtetas dhe është shpallur në kërkim një tjetër person, pas një incidenti të ndodhur paraditen e sotme në zonën e Freskut, Tiranë. Shtetasit Pajtim Allushi , 33 vjeç, dhe Saimir Allushi, 52 vjeç, janë proceduar për veprat penale të “Goditja për shkak të motiveve pronësore”, ndërkohë që Sindi Allushi, 27 vjeç, është shpallur në kërkim nga policia.
Sipas informacioneve të para, dy të rinjtë, Sindi Allushi dhe kushëriri i tij, Pajtim Allushi , kanë goditur fizikisht shtetasin D. K. për arsye të lidhura me çështje pronësie. Saimir Allushi, 52 vjeç, i cili është kryetar i njësisë administrative 12 në Tiranë, ka kërcënuar shtetasin D. K. përmes telefonit, duke përdorur kërcënime për të ndikur në zhvillimet e ngjarjes.
Në lidhje me këtë rast, policia ka nisur hetimet për kapjen e Sindi Allushit dhe po punon për gjetjen e automjetit me të cilin ai u largua nga vendi i ngjarjes. Ndërkohë, Drejtori i Drejtorisë Vendore të Policisë Tiranë ka urdhëruar pezullimin nga detyra dhe nisjen e procedurave disiplinore ndaj punonjësit të Policisë, inspektor P. M., për mosveprim të mundshëm gjatë ngjarjes.
Materialet procedurale janë referuar Prokurorisë së Tiranës, e cila do të marrë veprime të mëtejshme për ndriçimin e plotë të rastit.
Discussion about this post