Kryetari i Partisë Demokratike, Sali Berisha ka qenë i pari që e mori fjalën nga podiumi i protestës së opozitës, duke treguar se grushti nuk e ndaloi të protestonte.
Pasi u sulmua nga një qytetar në mënyrë krejt të rrufeshme me një grusht poshtë syrit, madje lideri demokrat u rrëzua, Berisha nuk i kurseu mesazhet nga protesta.
“Poshtë Edi Rama. Rroftë opozita shqiptare. Kundër regjimit të kriminelëve. Nder përjetë protestuesve”, ka thënë Berisha.
Ngjarja ka ndodhur në momentin që Berisha po ecte me kreun e Partisë së Lirisë Ilir Meta në bulevardin “Dëshmorët e Kombit” për të nisur protestën e parashikuar sot. Ishte një person, pjesë e turmës së protestuesve që ishin grumbulluar në bulevard.
Në momentin që Berisha është qëlluar ka rënë direkt në tokë dhe kanë ndërhyrë truprojat. Truprojat kanë goditur autorin, identiteti i të cilit ende nuk dihet. Ish-kryeministri është gjakosur në fytyrë dhe shihet i lënduar.
Discussion about this post