Trajneri i Manchester Cityt, teksa u pyet për shpenzimet e Chelseas për transferimet e janarit, kujtoi se, në sezonin 2019/2020, tetë klube të Premier Leagues, përfshirë edhe skuadrën ‘Blu’ të Londrës, dërguan një letër për të penguar ‘Qytetarët’ të apelonin sanksionin që u kishte dhënë UEFA për anashkalim të “Fair Play”-t Financiar.
“Ajo që Chelsea ka vendosur të bëjë nuk është puna ime. Sinqerisht, unë kurrë nuk përfshihem në opinionet e klubeve të tjera, sepse ka rregulla dhe rregulla që duhet ta bëjnë këtë. Pak vite më pare disa klube na akuzuan ne… Nuk e harroj. Atëherë tetë ose nëntë skuadra i dërguan një letër Premier League për të na përjashtuar, për të qenë jashtë Premier League. Kjo ndodhi me ne. Jemi ekipi i pestë për shpenzimet në këto pesë vitet e fundit. Ky është realiteti”,- siguroi Pep Guardiola.
Më 14 shkurt 2020, UEFA informoi Manchester Cityn se ishte sanksionuar me dy vjet për të mos luajtur në Europë dhe një gjobë prej 30 milionë, për mosrespektimin e ‘Fair Play’ Financiar.
‘Qytetarët’ apeluan në Gjykatën e Arbitrazhit Sportiv (CAS) për të apeluar sanksionin, ndërkohë që tetë klube të Premierligës (Liverpool, Chelsea, Manchester United, Wolverhampton, Leicester, Tottenham, Arsenal dhe Burnley) i dërguan kërkesën e përbashkët CAS-it për të mos e marrë në konsideratë apelin e Cityt.
Discussion about this post