Besimi i bizneseve dhe konsumatorëve pësoi rënie për herë të parë këtë vit në muajin gusht.
Të dhënat e Bankës së Shqipërisë tregojnë se Treguesi i Ndjesisë Ekonomike (TNE) pësoi një rënie të lehtë me 0.6 pikë përqindje.
Megjithatë, ky tregues ngelet ende dukshëm sipër mesatares afatgjatë, me 9.8 pikë përqindje më shumë.
Frenimi i TNE-së gjatë muajit gusht u shkaktua kryesisht nga rënia e besimit në sektorin e tregtisë. Rënie të lehtë pësoi edhe industria, ndërsa treguesit e besimit vijuan të rriten në sektorët e ndërtimit, shërbimeve dhe mes konsumatorëve.
Treguesi i besimit në tregti ra me 13.5 pikë përqindje krahasuar me muajin paraardhës, i ndikuar kryesisht nga vlerësimet e bizneseve për ecurinë aktuale të biznesit të tyre. Pavarësisht rënies së fortë të gushtit, niveli i besimit qëndron më lart krahasuar me periudhën para pandemisë.
Treguesi i besimit të industrisë shënoi rënie me 0.9 pikë përqindje krahasuar me muajin e kaluar, i ndikuar kryesisht nga vlerësimet më pak pozitive të bizneseve për ecurinë e kontratave porositëse nga eksportet. Në tërësi, vlerësimi i tyre për kontratat porositëse totale dhe prodhimin ishin me rritje të lehtë krahasuar me muajin korrik. Megjithatë, bizneset e industrisë presin rënie të prodhimit, çmimeve dhe të punësimit në muajt në vijim.
Treguesi i besimit në ndërtim vijoi prirjen rritëse në muajin gusht, duke qëndruar në nivelin më të lartë të pesë viteve të fundit. Indeksi u rrit me 0.8 pikë përqindje në krahasim me një muaj më parë. Kjo rritje pasqyroi vlerësimin e bizneseve për një nivel më të lartë të porosive aktuale, ndonëse vlerësimi i bizneseve në lidhje me aktivitetin ndërtues ishte më i ulët se një muaj më pare.
Edhe treguesi i besimit në shërbime regjistroi rritje për të pestin muaj rresht, duke arritur nivelin më të lartë të tre viteve të fundit. Rritja e tij me 0.8 pikë përqindje në muajin gusht u ndikua kryesisht nga komponenti i lidhur me kërkesën.
Edhe treguesi i besimit konsumator shënoi rritje në muajin gusht, duke iu rikthyer rritjes të regjistruar në pjesën më të madhe të vitit. Megjithatë, niveli i tij qëndron ende nën mesataren e vet afatgjatë. Treguesi i përgjithshëm pasqyroi përmirësimin e të gjithë komponentëve përbërës të tij. Vlerësimi i konsumatorëve për blerjet aktuale në shuma të mëdha dhe pritjet për to u përmirësua në gusht. Po kështu, edhe pritjet për situatën e përgjithshme ekonomike dhe situatën e tyre financiare u rritën lehtë.
