Humbja ndaj Portos me rezultatin 1-0 mbrëmjen e së martës nuk i ka shuar komplet shpresat te Milan, të paktën kështu ka thënë në konferencën për mediat pas kësaj sfide Zlatan Ibrahimovic.
Duke komentuar këtë disfatë suedezi u shpreh se kjo ishte ndeshja më e keqe për ta, ndërsa shtoi se kjo duhet ta rrisë skuadrën.
“Sot ishte ndeshja jonë më e keqe në Champions League. Fatkeqësisht jemi akoma me zero pikë pas tre ndeshjeve. Duhet të kujtojmë se kjo skuadër është kthyer në Champions League pas kaq shumë vitesh dhe lojëra si kjo do t’i japin përvojë të gjithë grupit të lojtarëve.”-u shpreh ai.
Më tej, ai shtoi se mungesat kanë ndikuar shumë në rezultatin e kësaj ndeshje, ndonëse ka theksuar se rikthimi i ka bërë mirë.
“Po, kishte shumë lojtarë që mungonin, por kjo është pjesë e futbollit. Unë sapo jam kthyer dhe jam i lumtur të luaj, më duhen më shumë minuta për të gjetur ritmin. Sa më shumë që luaj, aq më shumë ritmi kthehet. Ishte ndeshja e parë edhe për Bakayoko, por nuk dua të gjej justifikime. Në ndeshjen tjetër duhet të bëjmë më mirë. Ne duhet të shohim përpara dhe të bëjmë më mirë se sot në ndeshjen tjetër. Vetëm duhet të mësojmë.” -vijoi sulmuesi.
Në fund fjalën e tij Ibra e mbylli duke thënë se përderisa janë tre ndeshje të tjera dhe ekziston një mundësi sado e vogël për t’u kualifikuar ata do të besojnë.
“Janë tre ndeshje për t’u luajtur. Sezonin e kaluar luftuam për Champion League dhe për sa kohë ekziston një shans ne do të luftojmë. Fatkeqësisht, sonte kemi humbur, por unë nuk dorëzohem. Ne ende besojmë te kalimi i grupit.”-deklaroi Zlatan Ibrahimovic.
Si gjithmonë suedezi tregon se nuk di të dorëzohet dhe nuk ka gjë që e mposhtë në qëllimet që ai i vendos vetes./K.T/Gijotina.com
