Trajneri i skuadrës së Dinamos, Blendi Shkëmbi ka dalë sot në konferencë për mediat në prag të ndeshjes së parë në Kategorinë Superiore, pas një mungese prej 9 vitesh.
Para ndeshjes me Kastriotin që do të luhet të dielën në orën 13:45, Shkëmbi ka theksuar se nesër do jetë dita për të konkretizuar suksesin, ndërsa shtoi se do provohet edhe ekipi që është krijuar nga zero.
“Shpresoj që të ketë më pak polemika. Nga çdo sfidë do kërkojmë tri pikët, respektojmë kundërshtarët, nisur nga Kastrioti që ka një lojë të veçantë, merr karakterin e trajnerit. Dimë që është e vështirë por duam tri pikët.
Përpara kësaj ndeshje, është e qartë kush do startojë dhe do ndihmojë ekipin në 90 minuta. Të gjithë ne, stafi, jemi të qartë që këtë lodhje të dy muajve nesër ta konkretizojmë me sukses. Çdo skuadër ka presion, emri i madh i Dinamos të krijon presion për vetë emrin, duke nisur nga presidenti, të cilin e falenderoj për kushtet, duam të jemi në lartësinë e emrit që ka Dinamo.
Kemi krijuar nga zero ekipin dhe nuk kemi frikë as presion për nivele të larta. Emri i Dinamos të lejon të luftosh për titullin kampion ose minimum për Europë. Nga financat jemi ndërtuar për të qenë lartë.”-u shpreh ai.
Më tej ai ka shtuar se ka respekt për kundërshtarët e javës së parë, ndërsa theksoi se Dinamo pretendon të jetë më i miri i këtij sezoni.
“E thashë më parë, kur e shoh trajneri e tyre e di çfarë kërkon, në kontekstin pozitiv. Nëse nuk përgjigjemi me të njëjtën monedhë, do kemi problem. Kemi respekt për ta. Kam listën e futbollistëve të mijë, po punojmë për të qenë më të mirët e këtij kampionati. Analiza bëhet në fund.”-vijoi Shkëmdi.
Ndërsa theksojmë se ky sezon i Superligës ka për të qenë shumë interesantë, pasi kryeqyteti ka për të pasur disa derbi me rikthimin në elitën e futbollit shqiptar të Dinamos./Gijotina.com
