‘Hajduti i lirë, denoncuesi në bankën e të akuzuarve’/ Balliu: Berisha guxoi të denoncojë aferat e Ramës

Deputeti i PD, Klevis Balliu ka ripërsëritur sërish shqetësimin për drejtësinë në vendin tonë, që sipas tij, ajo është përmbysur.

Përmes një reagimi në rrjetet sociale, Balliu shkruan se në Shqipërinë e Edi Ramës, në vend të hajdutit, në bankën e të akuzuarve ulet, denoncuesi.

Duke e akuzuar Ramën, si personin që ka ngritur një regjim korrupsioni dhe bashkëpunimi me krimin, Balliu thotë se i vetmi që ka pasur guximin të denoncojë aferat që kanë varfëruar shqiptarët, ka qenë lideri i opozitës, Sali Berisha.

Reagimi

Në Shqipërinë e Edi Ramës, drejtësia është përmbysur: në bankën e të akuzuarve nuk ulet ai që vjedh, por ai që denoncon vjedhjen.

Jo Kryeministri që ka ngritur një regjim korrupsioni dhe bashkëpunimi me krimin, por Lideri i Opozitës — i vetmi që ka pasur guximin të denoncojë aferat që kanë varfëruar shqiptarët.

Ndërkohë, Edi Rama vijon të qeverisë përmes një sistemi të kalbur korrupsioni: nga afera e inceneratorëve te skandali i sterilizimit; nga koncesionet abuzive të PPP-ve, te lidhjet me bandat dhe kartelet ndërkombëtare.

Vjedh me energjinë, me rrugët që kushtojnë si floriri, me çdo hallkë të shtetit, ndërsa qytetarët paguajnë çmimin e varfërisë dhe padrejtësisë.