Këngëtari i muzikës popullore, Bledar Hoxhaj, ka denoncuar se ka rënë pre e një vjedhjeje në Fier, teksa ndodhej në ceremoninë mortore të kushëririt të tij të parë.
Sipas asaj që Hoxhaj ka bërë publike në rrjetet sociale, ngjarja ka ndodhur rreth orës 10:00, kur një person është futur në automjetin e tij tip “Audi Q5”, me ngjyrë gri të errët. Këngëtari pretendon se personi ka marrë paratë që ndodheshin në portofolin e lënë brenda automjetit, ndërsa vetë portofolin nuk e ka marrë.
Hoxhaj thotë se momenti është regjistruar nga kamerat e sigurisë, të cilat kanë fiksuar edhe personin duke hyrë në automjet. Sipas tij, pas vjedhjes, autori është larguar me një automjet tip “Opel”, me ngjyrë gri të hapur.
Përmes postimit, këngëtari u ka bërë apel qytetarëve që mund të njohin personin, të kenë parë automjetin ose të disponojnë informacione të vlefshme, që ta kontaktojnë.
Ai ka bërë të ditur gjithashtu se pamjet e kamerave të sigurisë do t’u vihen në dispozicion organeve përkatëse.
Reagimi i plotë:
Apel për ndihmë
Gjatë ceremonisë mortore të vëllait tim (kushëri i parë), rreth orës 10 e pak minuta, një person është futur në makinën time Audi Q5, ngjyrë gri e errët, dhe ka marrë vetëm paratë që ndodheshin brenda portofolit. Portofolin e ka lënë në makinë.
Gjithçka është e filmuar nga kamerat e sigurisë, përfshirë momentin kur personi futet në makinë. Pas kësaj, personi largohet me një makinë Opel, ngjyrë gri e hapur.
Nëse dikush e njeh personin, ka parë makinën ose ka ndonjë informacion që mund të ndihmojë, ju lutem të më kontaktojë.
Pamjet do t’u dorëzohen organeve përkatëse.
Në një ditë zie, kur isha duke përcjellë vëllain tim për në banesën e fundit, është shumë e dhimbshme të ndodhë edhe diçka e tillë.
Ju lutem, shpërndajeni që informacioni të arrijë te personi i duhur.
Discussion about this post