Drejtori i Përgjithshëm i policisë së shtetit Haki Çako pranoi se strukturat drejtuese të policisë së Elbasanit kanë qenë të paafta për të menaxhuar ngjarje të rënda kriminale si ajo e disa javëve më parë në këtë qytet. Çako njoftoi sot shkarkimin e drejtorit dhe nëndrejtorit të policise në këtë qark, si dhe masa disiplinore për 11 drejtues të tjerë në policinë e Elbasanit.
Ngjarja e 18 shtatorit shkaktoi tërmet në drejtorinë e policisë së Elbasanit, një muaj pas saj. Dy drejtuesit kryesorë nuk do të jenë më në krye të policisë në këtë qytet. Drejtori i Përgjithshëm Haki Çako tha se janë marrë masa displinore edhe për 10 drejtues dhe punonjës të tjerë në këtë drejtori qarku.
Drejtoria Vendore e Policisë Elbasan , sipas Çakos, do t’i nënshtrohet një ristrukturimi nga themelet. Ndërsa në krye të saj komandoi Altin Qaton.
“Për këtë arsye kam komanduar në krye të kësaj drejtorie një nga drejtuesit më të lartë të Policisë së Shtetit, Drejtorin e Departamentit të Sigurisë Drejtues i Lartë Altin Qato, i cili do të mbështetet nga një sërë specialistësh të Drejtorisë së Përgjithshmë të Policisë së Shtetit, të caktuar në mbështetje të tij për drejtimin dhe menaxhimin e strukturave Vendore qoftë në planin e ristrukturimit të plotë, qoftë në planin e goditjes së elementeve kriminalë”.
Drejtori i Përgjithshëm i Policisë pranon dështimin e bluve të Elbasanit.
“Forcat e policisë, të angazhuara në një operacion kontrolli rutinë, u përballën me disa individë të dyshuar.Fatkeqësisht, forcat policore nuk ishin në lartësinë që kërkon detyra. Mosveprimi i tyre solli që të dyshuarit të largohen dhe kësisoj operacioni të dështonte.Pamjet filmike të operacionit të dështuar ishin gjithashtu tronditëse. Dëshmia që u përcoll në opinionin publik e forcave policore që vëzhgonin të dyshuarit teksa largoheshin, madje dhe goditeshin prej tyre pa marrë asnjë kundërpërgjigje, ishte shokuese.Policia e Shtetit është në shërbim dhe në mbrojtje të qytetarëve dhe misioni ynë është të transmetojmë siguri tek publiku”.
Lëkundjet në misionin e policise, sipas Haki Cakos, janë nje fenomen që duhet mirëkuptuar si pjesë e një procesi reformimi e transformimi rrënjësor që ka nisur, por nuk ka mbaruar. Ndaj kreu I policise shqiptareve u drejton nje apel gjithe qytetareve
Kini besim të plotë tek Policia e Shtetit.
https://www.youtube.com/watch?v=Dw8SPY4LE7I
