Grupi palestinez Hamas ka konfirmuar vdekjen e shefit të vet ushtarak Mohammed Sinwar, i vrarë muaj më parë nga Izraeli me goditje nga ajri.
Foto të Sinwar-it dhe “martirëve” të tjerë, të gjithë persona me influencë në grup, që tashmë nuk jetojnë më, u shfaqën në një video treminutëshe që niste me luftën e Hamasit kundër “tiranëve” izraelitë.
Mohammed Sinwar ishte vëllai i vogël i Yahya Sinwar, ish-lideri i grupit terrorist, me të cilin, sipas Izraelit, u ideua sulmi i 7 tetorit 2023. Yahua u eliminua tetorin e kaluar, ndërsa vëllai i tij në muajin maj të këtij viti.
Sulmet izraelite ndaj pjesëtarëve të lartë të grupit Hamas kanë vijuar edhe orët e fundit. Televizioni saudit Al-Arabiya njoftoi se zëdhënësi i krahut ushtarak të Hamasit, Abu Obeida ose i njohur edhe si Hudayfa Samir Abdallah al-Kahlout, u vra natën e kaluar nga një goditje nga ajri teksa qëndronte në apartamentin e tij në qytetin e Gazës. Sipas njoftimit, gjithë personat në apartament humbën jetë, ndërsa vdekja e Obeida-s u konfirmua nga vërtetua nga familjarët e tij.
Sulmi u konfirmua nga ushtria dhe agjencia izraelite e sigurisë, Shin Bet, që konfirmuan goditjen ndaj një operativi të Hamasit, pa e identifikuar viktimën.
Lufta 22-mujore mes Izraelit dhe Hamasit ka lënë dhjetëra mijëra të vrarë në territorin palestinez dhe i ka futur banorët e Rripit të Gazës në një krize urie për shkak të bombardimit të shumicës së qytetit dhe pamundësisë për të siguruar ndihma nga jashtë nën sulmet e vazhdueshme.
Izraeli po lufton edhe në fronte të tjera, kryesisht me grupin libanez Hezbollah, të cilin e sulmoi edhe të dielën. Ushtria informoi se goditi “infrastrukturën ushtarake dhe të nëndheshme”, ku dyshohet se operonte grupi.
Sulmet nga Hezbollahut vijnë në kohën kur qeveria libaneze ka premtuar se do të ndërmarrë hapa për ta çarmatosur grupin që kontrollon pjesën jugore të Libanit prej dekadash. Hezbollahu është zotuar se nuk do t’i dorëzojë armët e veta.
Discussion about this post