Hamasi pranon armëpushimin 60-ditor, Netanyahu heziton: Kërkon çarmatim total

Hamas ka njoftuar se ka pranuar një propozim për një armëpushim 60-ditor në Gaza, i cili përfshin lirimin e rreth gjysmës së pengjeve izraelite në këmbim të lirimit të disa të burgosurve palestinezë nga Izraeli.

Propozimi është rezultat i negociatave të ndërmjetësuara nga Egjipti dhe Katari, me mbështetjen e Shteteve të Bashkuara.

Megjithatë, Izraeli nuk ka dhënë ende një përgjigje zyrtare ndaj këtij propozimi.

Ndërkohë, protestat në Izrael janë intensifikuar, me qytetarë që kërkojnë kthimin e pengjeve dhe përfundimin e luftës.

Familjet e pengjeve kanë shpallur një protestë të re mbarëkombëtare për të ushtruar presion mbi qeverinë izraelite.

Por, pavarësisht hapit nga Hamasi, një zyrtar izraelit konfirmoi se propozimi është marrë në Jeruzalem, por Kryeministri Benjamin Netanyahu e ka refuzuar përgjigjen e Hamasit, duke lënë të kuptohet se Izraeli do të vazhdojë me ofensivën e planifikuar për të marrë kontrollin e Qytetit të Gazës.

“Hamasi është nën presion të madh,” tha Netanyahu, duke sinjalizuar vendosmërinë për të ecur përpara me operacionin ushtarak dhe për të zhvendosur popullsinë nga qyteti drejt jugut të Rripit të Gazës.

Tensionet mbeten të larta, ndërsa ndërmjetësit vijojnë përpjekjet për të shmangur një përshkallëzim të mëtejshëm.

Një zyrtar izraelit ka deklaruar se qëndrimi i Izraelit për një marrëveshje gjithëpërfshirëse nuk ka ndryshuar, duke theksuar se angazhimi mbetet për lirimin e të gjithë pengjeve dhe përmbushjen e kushteve të tjera për përfundimin e luftës.

Megjithatë, Kryeministri Benjamin Netanyahu nuk e ka përjashtuar mundësinë e një marrëveshjeje të pjesshme, çka tregon se propozimi i fundit nga Hamasi mund të jetë ende në shqyrtim.

Mediat izraelite raportojnë se Netanyahu pritet të analizojë propozimin e ri.

Sipas një diplomati arab, propozimi i përditësuar i paraqitur nga Hamasi përfshin një armëpushim 60-ditor dhe parashikon lirimin e 10 pengjeve izraelitë të gjallë në këmbim të 150 të burgosurve palestinezë.

Marrëveshja përfshin gjithashtu kthimin e trupave të pengjeve të vrarë.

Mediat vendase raportojnë se bisedimet po zhvillohen në Kajro me ndërmjetësimin e Egjiptit, Katarit dhe SHBA-së, ndërsa edhe Turqia është përfshirë në përpjekjet diplomatike.

Ndërkohë, situata humanitare në Gaza vazhdon të përkeqësohet, me më shumë se 62,000 palestinezë të vrarë që nga fillimi i konfliktit në tetor 2023.