Në Partinë Demokratike nuk ka traditë për një garë të ndershme e të hapur, tha Gjergj Hani, i cili garoi përballë Lulzim Bashës më 29 korrik për kreun e PD-së zyrtare.
Në studion e A2Cnn, Hani tha se rezultatet e zgjedhjeve në PD kanë qenë të paracaktuara dhe shumë anëtarë për vite me radhë i kanë pranuar këto vendime në heshtje.
“Ishte një rezultat i pritshëm ai i zgjedhjeve për kreun e PD. Nuk ka qenë në traditat e Partisë Demokratike një garë e ndershme e hapur, ka qenë gjithnjë e paracaktuar. Një pjesë e demokratëve i kanë pranuar këto vendime duke mbyllur hundët. Për mua ishte një kryengritje morali, kanë humbur identitetin”, tha Hani.
Ai shprehet se në garën e 29 korrikut nuk ishte kushte të barabarta për të garuar përballë Bashës, të cilin e fajëson për humbjen e identitetit të Partisë Demokratike.
“Nuk arrita të organizoj takime. Ato i organizon struktura që bën fushatën. Strukturat ishin të njëanshme. Është një praktikë pune normale. Kur i shërben një njeriu për 12 vjet krijon një empati një lidhje shpirtërore.
Ata bënë atë që dinin të bënin më mirë. Unë e dija. Unë nuk hyra në garë për të legjitimuar Bashën. Unë e bëj përgjegjës Bashën për humbjen e identitetin e PD dhe humbjet për 10 vjet radhazi përballë Ramës”, përfundoi Gjergji Hani.
Discussion about this post