Nga dita e nesërme do të hapen aplikimet për përfitimin e kredisë së butë. Anisa Subashi, drejtore e shërbimit social në bashkinë e Tiranës, deklaroi gjatë një interviste televizive se, të gjithë kategoritë në nevojë që rezultojnë të pastrehë në kryeqytet, do të mund të aplikojnë për të përfituar nga programi social i bashkisë. Nga kjo thirrje do të përfitojnë 300 individ, çifte apo familje që plotësojnë kriteret.
Ajo tregoi se dy nga kriteret kryesore janë që aplikantët duhet të jenë mbi 18 vjeç dhe të ardhurat e tyre minimale nuk duhet të kalojnë vlerën 80 mijë lekë në muaj. “Së pari duhet të jesh mbi 18 vjeç. Nuk duhet të kesh një pronë të regjistruar në hipoteke, ose prona në të cilën jetoni nuk është e mjaftueshme për të banuar së bashku me anëtarët e tjerë të familjes. Ndërsa kriteri tjetër është të ardhurat mujore. Nga ky program përfitojnë ata që kanë një të ardhur nga 30 mijë deri në 80 mijë lekë në muaj. Kjo do të jetë e vlefshme si për individët ashtu edhe për çiftet e reja. Kjo e ardhur sipas kritereve konsiderohet e pamjaftueshëm për të blerë një pronë, ndaj bashkia subvencionon interesat e kredisë”, u shpreh Subashi. Ajo theksoi se aplikimet do të jenë të hapura deri në 10 janar 2022.
Discussion about this post