Ministrja e Bujqësisë, Frida Krifca ditën e sotme, 5 nëntor në Kuvend u shpreh se sektori i blegtorisë është në një moment kritik dhe për këtë arsye do të ketë disa iniciativa. Ajo përmendi krijimin e një akademie për barinjtë.
“E dimë që blegtoria ka një rënie, pasi është e vështirë, nuk duan njerëzit që të shkojnë në mal të jenë bari, është e vështirë, duan të bëjnë një profesion që është më i lehtë për ta. Pse nuk shkon ti të bëhesh bari? (iu drejtua ministrja njëri prej deputetëve) Nuk është vetëm çështje shkolle. Është një profesion i trashëguar që duam ta ruajmë dhe çfarë do të bëjmë ne? Do të iniciativojmë të rinjtë, do shkojmë t’i gjejmë, do të bëjmë një akademi për ata. Do të bëjmë një grup njerëzish dhe do t’i themi, ti futu në këtë profesion, mbaje dhe ne do të subvencionojmë për këtë, jo për krerë por për faktin që ti e mban tufën” – ishte fjala e ministres Krifca.
Deputeti demokrat Saimir Korreshi, me anë të një postimi në rrjetin social Facebook i është përgjigjur ministres. Korreshi shkruan se vetëm kjo qeveri mund të ketë një ministre bujqësie të lindur në Bllok.
“Hapet Akademia e Barinjve! Pak ditë më parë Kryebaresha më falni Ministresha e Bujqësisë erdhi dhe festoj 100 vjetorin e Shkollës së Parë Bujqësore në Lushnje. Paska qenë me qitje të largët. Po kërkohen barinj dhe për të promuovuar këtë nismë do hapim akademi. O zot o zot ku ka shkuar kjo botë. Ministre Bujqësië që ka lindur në Bllok vetëm kjo qeveri mund të këtë. Zonja ministreshe po guna leshi do t’i rimbursoni për barinjtë e rinj?” – shkruan deputeti Korreshi.
Discussion about this post