Qytetarët dhe studiuesit e Lushnjës tashmë mund të marrin shërbimin përmes Këndit Arkivor, i cili u çel sot në bibliotekën e qytetit.
Me këtë projekt DPA ndihmon çdo qytetar për t’ia çuar arkivat pranë, njësoj sikur të ishin në zyrat e DPA-së në Tiranë. Rregullat, procedurat, forma e shpejtësia janë të njëjta si Salla e Studimit në Drejtorinë e Përgjithshme të Arkivave.
Të pranishëm në hapjen e këtij Këndi Arkivor ishin drejtori i Drejtorisë së Përgjithshme të Arkivave Prof.As.Dr. Ardit Bido, nënkryetarja e bashkisë së qytetit të Lushnjës Eriselda Sefa, Drejtori i Muzeut Niko Ferro dhe përgjegjësi i Bibliotekës së qytetit të Lushnjës Bledi Puka.
“Të gjitha dokumentacionet që burojnë nga Arkivi i Shtetit tashmë janë lehtësisht të qasshme nëpërmjet platformës elektronike edhe në Këndin e ri Arkivor të Lushnjës”, – tha Bido.
Sipas tij, DPA shumë shpejt do të hap kënde arkivore edhe në qytete të tjera.
Nisma synon hapjen e 100 këndeve arkivore kudo ku jetojnë shqiptarë, por aktualisht ky është një shërbim që ofrohet në Gjirokastër, Sarandë, Pogradec, Shkup (Maqedoni e Veriut), Prishtinë dhe Elbasan.
