Përmes të dhënave të publikuara së fundmi Komisioni Qendror i Zgjedhjeve ka treguar se deri më tani janë hapur 21 kuti, nga 519 që do të rinumërohet. Sipas KQZ, deri më tani nuk ka rezultuar që ndonjë subjekt të ketë vjedhur vota me 25 prill.
Të paktën, elementë të vjedhjes së votave apo abuzimit me rezultatin elektoral, nuk janë gjetur në dy ditët e para të rinumërimit në KQZ. Bëhet me dije se, nga 21 kutitë e hapura deri më tani, nga 519 të përzgjedhura për tu verifikuar, janë zbuluar vetëm diferenca me plus apo minus 1-3 vota.
Në vlerësimin e Komisionit këto hyjnë tek gabimet njerëzore dhe janë larg rasteve kur mund të dyshohet për vjedhje votash apo abuzim nga numëruesit në favor të një partie apo një kandidati, çka mund të dërgojë në prokurori ndonjë prej numëruesve. Gjithsesi, rinumërimi do të vazhdojë për çdo zonë zgjedhore dhe do të hapen 10 % e kutive të përzgjedhura me short. Ky proces verifikimi po kryhet për herë të parë, ndërsa bëhet me dije se rinumërimi nuk do të prekë rezultatin e zgjedhjeve të 25 prillit.
