Hapte bravat me çelës të kopjuar, arrestohet 21-vjeçari në Tiranë

Në kuadër të operacionit policor të koduar “Çelësi”, për goditjen e veprimtarisë kriminale në fushën e vjedhjes së pronës dhe pasurisë, policia e Tiranës ka arrestuar 21-vjeçarin, Marsel Sula.

Operacioni u zhvilluar nga Komisariati i Policisë Nr. 2, ku në bazë të informacioneve janë dokumentuar 8 raste të vjedhjeve në banesa.

Policia ka sekuestruar një mekanizëm çelës përshtatës që shërben për kopjimin/klonimin dhe hapjen e bravave, një kuti me vegla dhe çelësa si ato të kopjimit të çelësave të bravave, një çelës makine, çelësa të ndryshëm banesash, dy aparate celulare, një dronë me kamër, 3 televizorë, 24 ora dore të markave të ndryshme, 4 çanta të ndryshme, një iPad, një kamera sigurie, një playstation dhe 4 laptopë, disa bizhuteri floriri, 295.000 lekë të rinj, 6400 euro, 276 dollarë dhe 490 paund.

Nga hetimet ka rezultuar se Marsel Sula, pasi i studionte banesat, duke përdorur disa pajisje speciale, bënte kopje të çelësave dhe me pas kryente vjedhjet, duke hyrë në banesa pa dëmtime të dyerve apo dritareve dhe duke iu shmangur kamerave të sigurisë.

Nga tërësia e veprimeve hetimore ka rezultuar se nëpërmjet këtij mekanizimi, ky shtetas dyshohet të ketë vjedhur në 8 banesa të ndryshme, gjatë muajit dhejtor 2021 dhe muajve janar dhe shkurt 2022, konkretisht:

* Më datë 07.12.2021, në rrugën “Petro Cani”, dyshohet se ka vjedhur disa bizhuteri në banesën e shtetases G. C.;

* Më datë 21.12.2021, në rrugën “Luigj Gurakuqi”, dyshohet se ka vjedhur një orë, një çantë dhe një laptop në banesën e shtetases F. Z.;

* Më datë 26.12.2021, në rrugën “Faik Konica”, dyshohet se ka vjedhur një orë, një çantë dhe një laptop në banesën e shtetasit A. C.;

* Më datë 12.01.2022, në rrugën “Xhorxhi Martini”, dyshohet se ka tentuar të vjedhë në banesën e shtetasit E. P.;

* Më datë 15.01.2022, në rrugën “Reshit Çollaku”, dyshohet se ka vjedhur një laptop në banesën e shtetases O. K.

* Më datë 16.01.2022, në rrugën “Irfan Tomini”, dyshohet se ka vjedhur një shumë parash në banesën e shtetasit I. R.;

* Më datë 25.01.2022, në rrugën “Lidhja e Prizrenit”, dyshohet se ka vjedhur një televizor dhe disa laptopë në banesën e shtetasit F. M.;

* Më datë 07.02.2022, në rrugën “Perlat Rexhepi”, dyshohet se ka vjedhur një shumë parash dhe bizhuteri në banesën e shtetases F. S.

Vijon puna për dokumentimin e vjedhjeve të tjera që mund të jenë kryer nga ky shtetas. Materialet i kaluan Prokurorisë së Rrethit Gjyqësor Tiranë, për veprime të mëtejshme procedural.