Kryetari i Aleancës për Ardhmërinë e Kosovës (AAK), Ramush Haradinaj ka thënë se Aleanca sot ka dyfishim të trupit të vet elektoral, e me tendencë të rritjes së mëtutjeshme.
Haradinaj ka thënë se mobilizimi në diasporë, organizimet e brendshme dhe qeverisja në pesë Komuna, i kanë dhënë rezultatet e veta.
“Është evidente që Aleanca, po kthehet në adresë politike për shumë nga ju. Organizimet e brendshme, mobilizimi në diasporë, qeverisja me duar të pastra e Aleancës në 5 komuna të rëndësishme të vendit si dhe kursi i ynë politik në mbrojtje të interesave të shtetit e të qytetarit, tashmë po i japin rezultatet e veta. Sipas sondazheve kredibile Aleanca qysh sot ka dyfishim të trupit të vet elektoral, e me tendencë të rritjes së mëtutjeshme”, ka thënë mes tjerash Haradinaj.
Kjo rritje eksponenciale e Aleancës, sipas tij, duket qe nuk po u pëlqe kundërshtarëve politikë, prandaj veç po paralajmërohet lufta e radhës me sondazhe.
“Aleanca do të vazhdojë me konsistencë dhe e palëkundur në kursin e vet politik dhe asnjëherë nuk do të bëjë kalkulime për kurrfarë interesash të ngushta e afatshkurtra. Aleati i vetëm i yni do të jeni ju, qytetarët e Kosovës, dhe prandaj për asnjë çmim nuk do t’i bëjmë lak kësaj rruge”, tha Haradinaj./RTK
Discussion about this post