Kryetari i AAK-së, Ramush Haradinaj ka deklaruar se kryeministri i Kosovës Albin Kurti po bën gabim të madh me qëndrimin që po mban për çështjen e gazit me SHBA-të.
Mediat kosovare shkruajnë se Haradinaj tha se Kurti është ai që po shfaqet më komod me europianët, të cilët s’e kanë njohur Kosovën shtet, se sa me amerikanët.
“Askush në botë nuk mund ta refuzojë gazin. Është produkt energjetik që ka hyrë në çdo ekonomi të botës. Por, hartat janë të ndara, nuk për të hyrë gazi rus në Kosovë edhe për 1 mijë vjet. E këtë duhet ta dijë edhe Albini edhe gjithkush. Ka me hy gazi amerikan, ky mund t’ia vonojë edhe një ditë por është duke bërë gabim të madh, është duke dërguar sinjale të gabuara. Shiheni sa komod është me europianët që s’e kanë njohur Kosovën në dialog, e si iu ik amerikanëve. Ka të bëjë pak me mentalitet të majtë, ose logjika të majta. Nëse Amerika ka vendos që të jetë prezent si lojtar me gaz në gadishullin tonë, pra të ka ndryshuar jeta. Ne mund të gazifikojmë Kosovën e mos të varemi vetëm nga rryma. Ky nuk është një projekt që nuk i kushton asgjë Kosovës me këtë si të zgjohemi nga gjumi mund të fitojmë para,” tha Haradinaj.
Haradinaj shtoi se kryeministri po humbet kohë duke vonuar afatet kohore për implementim të këtij projekti.
