Kryetari i Aleancës për Ardhmërinë e Kosovës, Ramush Haradinaj propozoi krijimin e një fondi të posaçëm që do të shërbejë për forcimin e Ushtrisë së Kosovës. Haradinaj argumentoi se 100 milionë euro të parashikuara nga buxheti aktual i shtetit nuk mjaftojnë për atë që sipas tij duhet të jetë synim i përhershëm. Me këtë argumentim Haradinaj tha se do të dërgojë në Kuvendin e Kosovës këtë kërkesë, për të bërë të mundur legjitimitetin e saj.
“Duhet ta rrisim fuqinë tonë mbrojtëse. 100 milionë në vit nuk mjaftojnë për një ushtri të fortë, që na mbron e që na bën të barabartë me të tjerët’, u shpreh Haradinaj, siç njofton AAK, në akademinë përkujtimore për Demë Ali Pozharin dhe tribunët popullorë Salih Rama, Mehmet Gradica dhe Bilall Dreshaj.
Ai tha se ky shtim në buxhet mund të financohet dhe nga vet shqiptarët përmes donacioneve.
“Kuvendi i Kosovës duhet të nxjerr një ligj për një fond për ndihmë ndaj Ushtrisë së Kosovës. Për donacione të shqiptarëve kudo që janë, në trojet e veta etnike apo në diasporë, për Ushtrinë e Kosovës. Pra një ligj që është transparent dhe që i mundëson Ministrisë së Mbrojtjes, për cdo vit rritjen e buxhetit për Ushtrinë. Pra rritjen e teknikës ushtarake”, shtoi ai.
Haradinaj theksoi se duhen 10 miliardë euro buxhet nga 100 milionë sa është aktualisht, në mënyrë që Ushtria e Kosovës të jetë në kushte të barabarta me shtetet e tjera dhe të jetë në nivelin e duhur për të siguruar stabilitetin kombëtar.
“Për të mundur të barazohet Kosova me agresorin tonë te djeshëm, për ta arritur gjendjen e nivelit të fuqisë ushtarake, Ushtrisë së Kosovës duhen 10 miliardë euro buxhet. 100 milionë euro në vit nuk janë të mjaftueshme as për mirëmbajtjen e gjendjes ekzistuese e as për rritjen e kapaciteteve ushtarake në nivelin që është e nevojshme. E them këtë për shkak se Kosova nuk duhet ta ketë më brengë sigurinë e saj. Siguria kur ta jep tjetri nuk është e jotja. Ne jemi përjetësisht falënderues dhe mirënjohës Amerikës dhe NATO-s për ndihmën që na kanë dhënë dhe që vazhdojnë ta japin për vendin tonë”, u shpreh Haradinaj.
Ai kujtoi dhe historinë e popullit të Kosovës duke u shpreh se atdhedashuria nuk ka munguar kurrë, por mungesa e pajisjeve teknike zbeh aftësitë e ushtarëve dhe oficerëve të Kosovës.
“Ne nuk jemi rastësisht ata që kemi mbijetuar ne tokat tona dhe jemi ende këtu. Jemi falë burrave të zotë që kishim. Edhe sot nuk po ankohemi për djem e burra të zotë. Ushtria jonë, kadetët dhe oficerët tonë janë ndër më të mirët në botë. Kudo që shkojnë, në secilën akademi ushtarake marrin çmimet më të larta sa i përket profesionalizmit, por sa i përket teknikës, pajisjeve dhe aspekteve tjera që e bëjnë barazimin ushtarak, fatkeqësisht jemi vonë për shkak që ja kemi nisur vonë. Jemi ushtri e re prandaj duhet ta nxjerrim një ligj në Kuvend për krijimin”, u shpreh Haradinaj.
Discussion about this post