Kryetari i AAK-së, Ramush Haradinaj ka kërkuar nga kryeministri Albin Kurti të ndryshojë kahje në raport me targat, në të kundërtën, thotë se po rrëshqet në tradhti. Përmes një shënimi në Facebook ai ka thënë se situata në Kosovë po përkeqësohet nga çasti në çast ndërsa sipas tij “Kryeministri nuk e ka idenë se çka po ndodhë me vendin e tij”. Haradinaj ka kërkuar nga Kurti shfuqizimin e vendimit për targat.
“Sot i kam kërkuar që urgjentisht të ndërrojë kahje e ta shfuqizojë vendimin e tij për targat e të mos e rrezikojë stabilitetin në vend e në rajon. Kosova ka nevojë për marrëveshje për njohje me Serbinë, e jo për populizma që me to t’i shërojë egot e sëmura Kryeministri”. “Ne nuk e kemi luksin që për tekat e tij, ta rrezikojmë ekzistencën e shtetit dhe lirinë e paguar shtrenjtë”, ka vijuar i pari i AAK-së.
Ai më tej është shprehur se Kurti nëse nuk harmonizohet me kërkesat amerikane, rrëshqet në tradhti.“Nëse kryeministri nuk ndërron kurs të veprimit dhe nuk harmonizohet me kërkesat amerikane menjëherë, ai sigurt se po rrëshqet në tradhti”. Opozitari thotë se nuk do të lejohet Kurti e askush tjetër që ta rrezikojë të ardhmen e vendit.
Më 30 tetor Qeveria mori vendim për zbatimin e vendimit për regjistrimin e makinave me targa ilegale serbe me targa të Kosovës: RKS, përkundër kërkesës së ndërkombëtarëve që ky vendim të shtyhet për dhjetë muaj. Plani i ri i Qeverisë së Kosovës, i publikuar më 28 tetor, pritet të zbatohet në tri faza. E para përfshin qortimin e shoferëve që vozisin makina me targa të paligjshme; e dyta parasheh gjobë deri në 150 euro për ata shoferë, dhe e treta targa provuese. Zbatimi i këtij plani pritet të përfundojë më 21 prill dhe, nga ajo datë, në qarkullim do të lejohen vetëm makina me targa RKS, apo Republika e Kosovës.
Pas publikimit të planit me tri faza, Shtetet e Bashkuara u shprehën “të zhgënjyera dhe të shqetësuara” me mos shtyrjen e vendimit edhe për dhjetë muaj të tjerë, ashtu siç kërkuan ato. Zhgënjim të ngjashëm, një ditë më vonë, shprehu edhe Bashkimi Evropian.
Discussion about this post