Kryetari i AAK-së, Ramush Haradinaj ka uruar të gjithë shqiptarët me rastin e 109-vjetorit të pavarësisë. Haradinaj përmes një postimi në Facebook, ka shprehur mirënjohje të përjetshme për prijësit themeltarë të shtetit shqiptar që lartësuan vlerat dhe idealet kombëtare.
“Përulje para veprës së heronjve e martirëve, të të gjithë brezave, që luftuan për të drejtën tonë. Falënderim popujve miq, që në kohën kur kanoseshim nga shfarosja, ishin përkrah nesh, Aleanca Veriatlantike NATO e prirë nga Shtetet e Bashkuara të Amerikës”, ka shkruar Haradinaj.
Ndër të tjera, ai renditi tri qëllime kryesore që sipas tij duhet të jenë në themel të marrëdhënieve mes dy vendeve tona.
“Linja hekurudhore Kosovë – Shqipëri. Mbrojtja e përbashkët ushtarake e Kosovës dhe Shqipërisë. Në funksion të forcimit të Ushtrisë së Kosovës, të nis iniciativë ligjore për Fondin e Ushtrisë, ku të gjithë shqiptarët do të kenë mundësinë të ndihmojnë me financa. Shtetësia shqiptare për të gjithë shqiptarët kudo që janë”, shprehet ai.
Kujtojmë se, shqiptarët këtë të dielë festojnë 109 vjetorin e krijimit të shtetit shqiptar, ku në 28 nëntor të 1912 është ngritur Flamuri në Vlorë nga Ismail Qemali.
Discussion about this post