Në një intervistë të gjatë të dhënë për gazetën spanjolle “MARCA”, Harry Kane ka folur mes shumë çështjesh edhe për çmimin e “Topit të Artë”, ceremonia e cila do të mbahet më 26 tetor, ditë kur do të shpallet dhe fituesi.
Sulmuesi i Bayern Munich ka patur një edicion fantasik me gjermanët, duke fituar titullin dhe Kupën, ndërsa në fushë ishte “shpërthyes” me golat e shënuar, plot 73 të tillë, përfshi këtu klub dhe kombëtare, statistikë vërtetë “e frikshme”.
Anglezi ishte i drejtpërdrejtë në deklaratat e tij, duke lënë të nënkuptohet se nuk është e nevojshme që të thotë me gojën e tij se kush e meriton, por u ndal vetëm tek faktet që “bërtasin” edhe të vërtetën.
“Është pak e komplikuar. Nuk më ka pëlqyer kurrë të flas shumë për veten. Por është e vërtetë. Të arrish të shënosh 73 gola, që me fjalë të tjera përcakton dhe shifrën e dytë më të lartë në histori, flet vetë.
E vetmja që mund të them është se edicioni i kaluar ishte vërtetë i jashtëzakonshëm, në nivelin personal dhe atë me skuadrën. Ishte sezoni më i mirë i jetës sime. Nuk është në dorën time. Varet nga njerëzit që do të votojnë. Dhe nga ky këndvështrim, sezoni i kaluar i përket të shkuarës.
Tashmë jam i fokusuar për vazhdimin. E di që do të ketë shumë diskutime për këtë çmim deri në tetor sepse është një çmim i madh. Por, momentalisht jam i fokusuar se çfarë mund të bëj tjetër me ekipin në këto çaste”, është përgjigjur Kane.
Discussion about this post