Harta e re gjyqësore/ “Dështon” bojkoti për masat, gjyqtarët zhvillojnë seancat me avokatët

Avokatët e Tiranës nuk e kanë respektuar as këtë të shtunë (2 korrik) bojkotin për masat e  sigurisë.

Në këtë gjykatë me praninë e avokatëve janë zhvilluar pesë masa sigurie duke treguar se ky vendim për bojkot nuk ka gjetur dakordësinë e avokatëve të kryeqytetit por edhe në rrethe.

Edhe në gjykatën e Elbasanit janë zhvilluar masat e sigurisë por dhe në gjykatat e rretheve të tjera ku ka pasur të arrestuar.

Avokatët kanë paralajmëruar se bojkoti do të vijojë pa afat deri në kthim pas të draftit të Këshillit të Lartë Gjyqësor.

Pak ditë më parë Këshilli i Lartë i Prokurorisë dhe prokurori i Përgjithshëm dhanë pëlqimin e tyre për këtë hartë ndërsa e argumentuan atë si më të përshtatshmen në situatën aktuale ku ndodhen gjykatat dhe prokuroritë.

Pro hartës kanë dalë edhe gjyqtarët, të cilët nëpërmjet shoqatës së tyre dhanë pëlqimin për miratimin e saj.

Propozimi për hartën do të dërgohet në qeveri e cila nëpërmjet një vendimi do të miratojë propozimin e Këshillit të Lartë Gjyqësor.

Aktualisht Shqipëria ka 6 Gjykata Apeli në gjithë vendin të cilat do të reduktohen në 1, ndërsa 13 do të jetë dhe numri i gjykatave të shkallës së parë nga 22 që është aktualisht.