Avokatët janë bashkë kundër hartës së re gjyqësore, ku një pjesë bojkoton duke mos shkuar në zyrë dhe një pjesë në punë. Ndaj Dhoma Kombëtare e Avokatisë do të mbledhë të mërkurën Këshillin e Përgjithshëm ku do të dalë me një qëndrim të detyrueshëm për të gjithë.
Dhoma Kombëtare e Avokatisë do të vendosë të mërkurën për mënyrën si do të vijojë protesta kundër hartës së re gjyqësore që mbrojtësit ligjore kundërshtojnë: Nëse vendimi i Këshillit të përgjithshëm do të jetë bojkot ai do të zbatohet dhe është i detyrueshëm për zbatim në gjithë Republikën.
Vetë kreu i dhomës së avokatisë, Maksim Haxhia, e kishte një përgjigje edhe për ministrin e Drejtësisë, Ulsi Manja, i cili e cilësoi të papranueshëm bojkotin e avokatëve.
“Ministri flet nga pozicioni i tij. Po të ishte avokat dhe të ishte me komunitetin tonë, do të fliste ndryshe.”
Nëse qeveria shqiptare i ndez dritën jeshile hartës së re gjyqësore të miratuar nga Këshilli i Lartë Gjyqësor, Dhoma e Avokatisë paralajmëron se do ta godasë në Kushtetuese.
“Kemi ngritur dhe grupin e punës që krahas kësaj të marrim masat që nëse kjo hartë do të miratohet ta bëjmë prezentë dhe në Gjykatën Kushtetuese si antikushtetuese. Edhe pse jam i bindur se qeveria me konstruktivitetin e vet nuk do të gabojë që të marrë një hartë të tillë.”
Revolta e avokatëve kundër hartës së re gjyqësore është shtrirë prej dy javësh në të gjithë vendin edhe pse në forma të ndryshme.
Këtë të enjte, protesta u zhvendos në Krujë.
Discussion about this post