Gjykata e Sarandës ka lënë të lirë 33-vjeçarin A. L nga Arabia Saudite. Ai u kap disa ditë më pare nga policia e Sarandës, pasi në dhomën e hotelit të tij u gjetën 3.3 gram hashash dhe 0.4 gram kokainë. “Kam ardhur me pushime në Sarandë së bashku me tre shokët. Pasi na ka shoqëruar në hotel, policia na ka kërkuar dokumentet e identifikimit të cilat nuk i kemi patur për momentin. Në këto kushte, policia na ka shoqëruar për në dhomën tonë për të marrë pasaportat. Lënda e gjetur nga policia është imja dhe e kam për përdorim vetjak. Lëndën narkotike e kam blerë thjesht për përdorim vetjak dhe e mbaja në dhomën e hotelit. Është hera e parë që vij me pushime në Sarandë dhe nuk e di me saktësi vendin se ku i kam blere lëndët narkotike cannabis sativa e kokainë, i kam blerë në rrugë, personin nuk e njoh. Lëndën narkotike cannabis sativa dhe kokainë i kam blerë në shumën 1200 lekë të reja”, është shprehur arabi gjatë hetimeve paraprake.
Gjykata e Sarandës ka vendosur ndaj tij masën e sigurimit “garanci pasurore 1 milion lekë” dhe “detyrimi për t’u paraqitur në policinë gjyqësore, një herë në muaj, ditën e hënë, të javës së parë, ora 10:00”.
Gjatë këtij sezoni turistik, shtetas të ndryshëm rezultuan problematike me ligjin për policinë e Sarandës. Të arrestuarit kanë qenë suedez, lituanez, arab, turk dhe nga Sri Lanka. Zakonisht ata janë akuzuar për sasi tepër të vogla droge, dhunë në familje, falsifikime e moskallëzim krimi. Të arrestuarit janë detyruar t’i vazhdojnë “pushimet” në Sarandë pasi Gjykata i ka lënë të lirë me garanci pasurore, por me kusht që të paraqiten në prokurori çdo javë apo muaj, ndërkohë që shtetasi nga Sri Lanka i akuzuar për moskallëzim krimi në një rast plagosje, ndodhet i izoluar në Paraburgimin e Sarandës.
